ඔස්ට්‍රේලියානු ස්වදේශ කටයුතු දෙපාර්තමේන්තුව (DHA) නිකුත් කළ ශිෂ්‍ය වීසා මාර්ගෝපදේශයට අනුව, ඇතැම් විශේෂ අවස්ථාවලදී ඕස්ට්‍රේලියාවෙන් පිටත සිට නව ශිෂ්‍ය වීසා අයදුම්පතක් ඉදිරිපත් කරන සිසුන්ට, කලින් අයදුම්පතට ඇතුළත් කර තිබූ පවුලේ සාමාජිකයන් (Dependents) ද නව අයදුම්පතට ඇතුළත් කිරීමට අවස්ථාව හිමිවිය හැකියි.

එහෙත් සියලුම සිසුන්ට හෝ ඔවුන්ගේ පවුලේ සාමාජිකයන්ට මෙම අවස්ථාව ස්වයංක්‍රීයව හිමිවන්නේ නැහැ.

විශේෂයෙන්ම, අධ්‍යයන කටයුතු අවසන් කිරීමට තවත් මාස 12ක් දක්වා කාලයක් අවශ්‍ය වීම හෝ අධ්‍යාපන ආයතනය පාඨමාලාව පවත්වාගෙන යාමට නොහැකි වීම වැනි අවස්ථාවලදී මෙම සහනය අදාළ විය හැකියි.

මෙය ශිෂ්‍ය වීසා අයදුම්කරුවන්ට මෙන්ම ඔවුන්ගේ පවුලේ සාමාජිකයන්ට ද වැදගත් වෙනසක් වන අතර, අදාළ කොන්දේසි සහ සුදුසුකම් සපුරාලීම අනිවාර්යයි.

ඒ අනුව, නව අයදුම්පතක් ඉදිරිපත් කිරීමට පෙර DHA නිල මාර්ගෝපදේශය පරීක්ෂා කර ගැනීම වැදගත් වනවා.

2026 ඔක්තෝබර් 2 වැනිදා සිට ක්‍රියාත්මක වූ නව නීති අනුව, බොහෝ ශිෂ්‍ය වීසා අයදුම්කරුවන්ට ඕස්ට්‍රේලියාව තුළ සිට නව අයදුම්පතක් ඉදිරිපත් කිරීමේදී සීමාවන් පනවා තිබෙනවා.

කෙසේ වෙතත්, දැනට පවතින ශිෂ්‍ය වීසා අයදුම්පතට ඇතුළත් කර සිටින පවුලේ සාමාජිකයන් සම්බන්ධයෙන් ඇතැම් විශේෂ සහන ක්‍රියාත්මක වනවා.

ප්‍රධාන පාඨමාලාව අවසන් කිරීමට තවත් මාස 12ක් දක්වා කාලයක් අවශ්‍ය වීම හෝ අධ්‍යාපන ආයතනය වසා දැමීම වැනි හේතුවක් නිසා නව ශිෂ්‍ය වීසා අයදුම්පතක් ඉදිරිපත් කිරීමට සිදුවන අවස්ථාවලදී, අදාළ කොන්දේසි සපුරන්නේ නම් කලින් වීසා බලපත්‍රයට ඇතුළත් කර සිටි පවුලේ සාමාජිකයන් ද නව අයදුම්පතට ඇතුළත් කිරීමට හැකියාව තිබෙනවා.

මෙම සහනය විශේෂයෙන්ම ඕස්ට්‍රේලියාවේ අධ්‍යාපනය ලබන අතරතුර වීසා කාලය දීර්ඝ කරගැනීමට අවශ්‍ය වන සිසුන්ට සහ අධ්‍යාපන ආයතනයේ ගැටලු හේතුවෙන් පාඨමාලාව වෙනස් කිරීමට සිදුවන සිසුන්ට වැදගත් විය හැකියි.

අදාළ වීසා කාණ්ඩය, අයදුම් කරන ස්ථානය සහ දෙපාර්තමේන්තුවේ සුදුසුකම් නිර්ණායක අනුව එක් එක් අයදුම්පත සලකා බැලෙනවා.

එබැවින් නව වීසා අයදුම්පතක් ඉදිරිපත් කිරීමට හෝ ඕස්ට්‍රේලියාවෙන් පිටවීමට පෙර තම වීසා තත්ත්වය සහ අදාළ කොන්දේසි පිළිබඳව නිසි උපදෙස් ලබාගැනීම වැදගත් වනවා.