ග්‍රීසියේ සිට ඔස්ට්‍රේලියාවේ Melbourne වෙත කොකේන් නම් තහනම් මත්ද්‍රව්‍ය ගෙන්වූ පුද්ගලයින් තිදෙනෙක් ඔස්ට්‍රේලියානු බලධාරීන් විසින් අත්අඩංගුවට ගෙන තිබෙනවා.

දැව භාවිතයෙන් සාදන ලද කැබිනට් 2ක් තුළ තිබී කොකේන් කිලෝ 120ක ප්‍රමාණයක් පසුගිය ඔක්තෝම්බර් 9 වැනිදා Australian Border Force නිලධාරීන් විසින් සොයාගෙන තිබූ බවයි වාර්තා වුණේ.

ගෘහ භාණ්ඩ ලෙස වර්ගීකරණය කර ඒවා තිබූ මෙම භාණ්ඩ X – ray කිරණ පරීක්ෂාවකට ලක් කිරීමේදී ඒ තුළ සඟවා තිබූ මත්ද්‍රව්‍ය සොයාගත් බවයි සඳහන් වෙන්නේ.

මේ සම්බන්ධව විමර්ශන කළ ඔස්ට්‍රේලියානු ෆෙඩරල් පොලිසිය, වික්ටෝරියානු පොලිසිය, සංවිධානාත්මක අපරාධ කාර්යසාධක බලකාය සිද්ධියට සම්බන්ධ තුන් දෙනෙකු අත්අඩංගුවට ගත් බව ඊයේ දිනයේදී නිවේදනයක් නිකුත් කර තිබුනා.

අත්අඩංගුවට ගත් තිදෙනා අතර එක් කාන්තාවක් සහ පුරුෂයින් දෙදෙනෙකු වන අතර ඔවුන් Melbourne මහේස්ත්‍රාත් අධිකරණය වෙත ඉදිරිපත් කිරීමෙන් පසු කාන්තාව පමණක් ඇප මත මුදාහැර තිබුණා.

දේශ සීමා හරහා තහනම් මත්ද්‍රව්‍ය ගෙන ඒම, දේශ සීමා අතර මත්ද්‍රව්‍ය ජාවාරම යන චෝදනා ඔවුන්ට එරෙහිව ගොනු කර ඇති අතර ඔස්ට්‍රේලියානු නීතිය අනුව ඔවුන් හට ජීවිතාන්තය දක්වා සිර දඬුවම් නියම විය හැකි බවයි වාර්තා වෙන්නේ.