Victoria ප්‍රාන්තය ඇතුළු සමස්ත ඔස්ට්‍රේලියාව පුරා Storm Season තත්ත්වය තවදුරටත් තීව්‍ර වෙමින් පවතිනවා.

Queensland ප්‍රාන්තයේ ඇතැම් ප්‍රදේශවල වාර්තාගත වර්ෂාපතනයක් සහ දරුණු ගංවතුර තත්ත්වයක් ඇතිවීමත් සමඟ, මේ සති අන්තයේ ඔස්ට්‍රේලියාවේ ප්‍රාන්ත රැසකට තද වැසි , දරුණු සුළි කුණාටු සහ ක්ෂණික ගංවතුර ඇතිවීමේ අවදානමක් පවතින බවට කාලගුණ විශේෂඥයන් අනතුරු අඟවනවා.

විශේෂයෙන්ම Melbourne ඇතුළු Victoria ප්‍රාන්තයේ ප්‍රදේශ රැසකට ඉරිදා උදෑසන දරුණු ගිගුරුම් සහිත වැසි ඇතිවීමේ හැකියාවක් පවතින බවයි වාර්තා වන්නේ.

කාලගුණ විද්‍යාඥ Tom Saunders වාර්තා කරන පරිදි, Western Australia දෙසින් පැමිණෙන ප්‍රබල Cold Front සහ නිවර්තන කලාපයෙන් පැමිණෙන තෙතමනය සහිත වායු ධාරා එකිනෙක හමුවීමත් සමඟ, South Australia සිට Victoria හරහා Tasmania දක්වා වර්ෂාපතනය ව්‍යාප්ත වීමට නියමිතයි.

විශේෂයෙන්ම ඉරිදා දිනයේ Central සහ Eastern Victoria ප්‍රදේශවලට ප්‍රබල සුළිකුණාටු ඇතිවිය හැකි අතර, ක්ෂණික ගංවතුර, ප්‍රබල සුළං සහ විශාල හිම කැට වැටීමේ අවදානමක් ද පවතිනවා.

Melbourne නගරයට ඉරිදා උදෑසන ගිගුරුම් සහිත වැසි ඇතිවීමේ වැඩි හැකියාවක් පවතින බවයි කාලගුණ අනාවැකි පෙන්වා දෙන්නේ.

මේ අතර Queensland සහ New South Wales ප්‍රාන්තවලට ද ඉදිරි දින කිහිපය තුළ තවදුරටත් තද වැසි සහ දරුණු කුණාටු ඇතිවිය හැකි බව සඳහන්.

Queensland හි Bundaberg ප්‍රදේශයෙන් සිකුරාදා පස්වරු 5 වන විට මිලිමීටර් 68ක වර්ෂාපතනයක් වාර්තා වී තිබෙනවා.

එමෙන්ම Nambour ප්‍රදේශයෙන් ඔක්තෝබර් මාසය සඳහා වාර්තාගත මිලිමීටර් 401ක වර්ෂාපතනයක් ද වාර්තා වී ඇති බව කාලගුණ වාර්තා පෙන්වා දෙනවා.

ඒ අනුව, Victoria, Queensland සහ New South Wales ප්‍රාන්තවල වෙසෙන ජනතාව, ඉදිරි දින කිහිපයේ කාලගුණ අනාවැකි සහ නිල කාලගුණ අනතුරු ඇඟවීම් පිළිබඳ අවධානයෙන් පසුවීම වැදගත්.

දරුණු වැසි සහ ගංවතුර අවදානමක් පවතින ප්‍රදේශවල ගමන් කිරීමේදී විශේෂ සැලකිල්ලක් දක්වන ලෙසත් බලධාරීන්ගේ උපදෙස් අනුගමනය කරන ලෙසත් ජනතාවට විශේෂයෙන් මතක් කර සිටින බවයි බලධාරීන් පවසන්නේ.