ඔස්ට්‍රේලියාවේ New South Wales ප්‍රාන්තයේ සාද සහ උත්සවවලදී Helium වායුව පුරවා ඇති බැලුන් අහසට මුදාහරින පුද්ගලයන්ට $200ක ස්ථානීය දඩයක් පැනවීමට නව නීතියක් සම්මත කර තිබෙනවා.

ප්ලාස්ටික් භාවිතය අවම කිරීමේ රජයේ නව සැලැස්ම යටතේ මෙම නීතිය පසුගිය බ්‍රහස්පතින්දා ප්‍රාන්ත පාර්ලිමේන්තුවේදී සම්මත වුණා.

මෙතෙක් බැලුන් 19ක් දක්වා අහසට මුදාහැරීමට තිබූ අවස්ථාව නව නීතියෙන් අහෝසි වන අතර, හිතාමතා එක් බැලුනයක් මුදාහැරීම පවා නීති විරෝධී වනවා.

මෙම නීතිය උල්ලංඝනය කරන සමාගම්වලට $400ක දඩයක් පැනවිය හැකි අතර, අධිකරණය මඟින් පුද්ගලයන්ට $1,100ක් දක්වා දඩ නියම කිරීමටත් අවස්ථාව තිබෙනවා.

බැලුන් 100ක් හෝ ඊට වැඩි සංඛ්‍යාවක් මුදාහැරීමේදී පුද්ගලයන්ට $3,630ක් දක්වාත්, සමාගම්වලට $6,050ක් දක්වාත් උපරිම දඩ පැනවිය හැකියි.

මෙම නීතිය හඳුන්වාදීමට ප්‍රධාන හේතුව වී ඇත්තේ බැලුන් මුහුදට වැටීමෙන් ඩොල්ෆින්, තල්මසුන්, මුහුදු කැස්බෑවන් සහ මුහුදු පක්ෂීන් ඇතුළු සතුන්ට සිදුවන හානියයි.

කෙසේ වෙතත්, බැලුන් අලෙවි කරන සැපයුම්කරුවන්ට එරෙහිවත් නීතිමය පියවර ගත යුතු බවට Greens පක්ෂය ඉදිරිපත් කළ යෝජනාව පරාජයට පත්ව තිබෙනවා.

නව නීතිය ආණ්ඩුකාරවරයාගේ අනුමැතිය ලැබීමෙන් පසු මෙම වසරේදීම ක්‍රියාත්මක වීමට නියමිත අතර, එය පරිසරයට හානි කරන ප්ලාස්ටික් අපද්‍රව්‍ය අවම කිරීමේ පුළුල් වැඩපිළිවෙළක කොටසක් ලෙස සැලකෙනවා.