ඔස්ට්‍රේලියාවේ නිවාස ණය හිමියන් ඇතුළු පවුල් රැසකට බලපාන පොලී අනුපාත ඉහළ දැමීම් අවසන් වන දිනය පිළිබඳව ඔස්ට්‍රේලියානු සංචිත බැංකුව විසින් අදහස් දක්වා තිබෙනවා.

ඒ අනුව පොළී අනුපාත ඉහල දැමීම නැවත්වීමට නම් උද්ධමනය පාලනය කළ යුතු බවයි RBAහි ආර්ථික විශේෂඥයින් පවසා ඇත්තේ.

උද්ධමනය පාලනය කිරීම සඳහා තවදුරටත් දැඩි තීරණ ගැනීමට සිදුවිය හැකි බවට ඔස්ට්‍රේලියානු සංචිත බැංකුවේ ප්‍රධාන ආර්ථික විද්‍යාඥවරිය වන ආචාර්ය Sarah Hunter සඳහන් කර තිබෙනවා.

පොලී අනුපාත සම්බන්ධයෙන් සංචිත බැංකුවේ තීරණවල ප්‍රධාන අරමුණ වන්නේ රටේ උද්ධමනය පාලනය කර ගැනීම බවයි ඇය වැඩි දුරටත් පවසා ඇත්තේ.

උද්ධමනය ඉහල යන විට ආහාර, ඉන්ධන, ප්‍රවාහන සහ අනෙකුත් අත්‍යවශ්‍ය භාණ්ඩ හා සේවාවල මිල ගණන් අඛණ්ඩව ඉහළ යන අතර, එය සාමාන්‍ය ජනතාවගේ ජීවන වියදමට දැඩි බලපෑමක් ඇති කරනවා.

උද්ධමනය පාලනය කිරීම සඳහා පොලී අනුපාත ඉහළ දැමීමෙන් ජනතාවගේ ණය ගැනීම සහ වියදම් කිරීම අඩු කිරීමටත්, ඒ හරහා ආර්ථිකයේ මිල පීඩනය පහත හෙළීමටත් සංචිත බැංකුව අපේක්ෂා කරනවා.

කෙසේ වෙතත්, මෙවැනි තීරණවලින් නිවාස ණය හිමියන්ට මාසිකව ගෙවීමට සිදුවන මුදල වැඩි විය හැකි අතර, පවුල්වල අයවැයට ද අමතර පීඩනයක් එල්ල වන බවයි පැවසෙන්නේ.

ආචාර්ය Sarah Hunter පෙන්වා දෙන තවත් වැදගත් කරුණක් වන්නේ, ගෝලීය තත්ත්වයන් ද ඔස්ට්‍රේලියාවේ උද්ධමනයට බලපෑම් කළ හැකි බවයි.

විශේෂයෙන්ම ජාත්‍යන්තර යුධ ගැටුම් හේතුවෙන් ඉන්ධන මිල ඉහළ යාම, ප්‍රවාහන වියදම් වැඩිවීම සහ ව්‍යාපාරික වියදම් ඉහළ යාම වැනි කරුණු අවසානයේ පාරිභෝගිකයන්ට දැනෙන මිල වැඩිවීම් බවට පත්විය හැකි බව සඳහන්.