ඔස්ට්‍රේලියාවේ ජීවත් වන සංක්‍රමණික කාන්තාවන් දහස් ගණනකට තම අධ්‍යාපන සුදුසුකම් සහ වෘත්තීය පළපුරුද්දට සරිලන රැකියාවක් ලබා ගැනීම තවමත් බරපතළ අභියෝගයක් වී තිබෙනවා.

මේ පිළිබඳව සිදු කළ නවතම සමීක්ෂණයකින් හෙළි වී ඇත්තේ ඔස්ට්‍රේලියාවේ සංක්‍රමණික කාන්තාවන් 340000ක් පමණ තමන් සතු කුසලතා සහ සුදුසුකම්වලට වඩා පහළ මට්ටමේ රැකියාවල නිරත වන බව සඳහන්.

එමෙන්ම, තම රැකියාවට සාපේක්ෂව වැඩි සුදුසුකම් ඇති පුද්ගලයන් අතර, සංක්‍රමණික කාන්තාවන්ගේ ප්‍රතිශතය සංක්‍රමණික පිරිමින්ට වඩා 20% කින් ඉහළ බව ද එම වාර්තාව පෙන්වා දෙනවා.

විවිධ රටවලින් ඔස්ට්‍රේලියාවට පැමිණෙන බොහෝ කාන්තාවන් උපාධි, වෘත්තීය සුදුසුකම් සහ වසර ගණනක සේවා පළපුරුද්දක් සහිතව පැමිණෙනවා.

නමුත් තම මව් රටේදී ලබාගත් එම සුදුසුකම් ඔස්ට්‍රේලියාවේදී පිළිගැනීමට ලක් කර ගැනීම පහසු කාර්යයක් නොවන බවයි එම වාර්තාව පෙන්වා දෙන්නේ.

විදේශීය සුදුසුකම් ඇගයීමේ ක්‍රියාවලිය, වෘත්තීය ලියාපදිංචිය සඳහා වන අවශ්‍යතා, අමතර අධ්‍යාපන සුදුසුකම් සහ ඒ සඳහා දැරීමට සිදුවන වියදම් මෙලෙස එම ක්‍රියාවලීන් අපහසු කිරීමට හේතු වී තිබෙනවා.

විශේෂයෙන් සෞඛ්‍ය සේවය, අධ්‍යාපනය සහ අනෙකුත් වෘත්තීය ක්ෂේත්‍රවල අත්දැකීම් ඇති කාන්තාවන්ට, තමන්ගේ පෙර වෘත්තීය මට්ටමට ඔස්ට්‍රේලියාව තුලදී නැවත පැමිණීමට දිගු කාලයක් ගත විය හැකි බවයි එම වාර්තාවේ සඳහන් වෙන්නේ.

ඒ හේතුවෙන් ඇතැම් කාන්තාවන්ට තමන්ගේ සැබෑ සුදුසුකම්වලට වඩා පහළ රැකියාවල නිරත වීමට හෝ නැවත අධ්‍යාපනය ලැබීමට සිදුවනවා.

මෙය ඔවුන්ගේ ආදායමට පමණක් නොව, වෘත්තීය දියුණුවට, පවුලේ ආර්ථික ස්ථාවරත්වයට සහ අනාගත විශ්‍රාමික ජීවිතයට ද බලපෑම් ඇති කළ හැකි තත්ත්වයක් බව විශේෂඥයින් පෙන්වා දෙනවා.

මේ අතර, සංක්‍රමණිකයන්ගේ විදේශීය සුදුසුකම් පිළිගැනීම සඳහා වඩාත් විධිමත් ජාතික වැඩපිළිවෙළක් සකස් කිරීමේ අවශ්‍යතාව ද මේ සමඟම අවධානයට ලක්ව තිබෙනවා.

තවද විදේශීය වෘත්තීය සුදුසුකම් පිළිගැනීමේ ක්‍රියාවලිය සරල කිරීම සහ සංක්‍රමණිකයන්ට තම වෘත්තීන් වෙත නැවත පිවිසීමට පැහැදිලි මාර්ග සකස් කිරීම ඒ අතර ප්‍රධාන යෝජනා වන බවයි පැවසෙන්නේ.