ඔස්ට්‍රේලියාවේ විපක්ෂය වන Coalition පක්ෂය, රජයේ වැඩසටහන් කිහිපයක් කපා හැරීමෙන් ඉදිරි වසර හතර තුළ ඩොලර් බිලියන 31.3ක් ඉතිරි කරගත හැකි බව ප්‍රකාශ කර තිබෙනවා.

දේශගුණික විපර්යාස සම්බන්ධ වැඩසටහන්, නිවාස ආධාර සහ ඇතැම් කර්මාන්ත සඳහා ලබාදෙන සහනාධාර අඩු කිරීම එම වියදම් ඉතිරි කිරීමේ යෝජනා අතරට ඇතුළත් බවයි පැවසෙන්නේ.

විපක්ෂ නායක Angus Taylor සහ විපක්ෂයේ Shadow භාණ්ඩාගාරික Tim Wilson විසින් ඉදිරිපත් කළ මෙම යෝජනා අනුව, විදුලි වාහන මිලදී ගැනීම සඳහා ලබාදෙන සහන, ගෘහස්ථ බැටරි සඳහා සහනාධාර සහ පුනර්ජනනීය බලශක්ති ව්‍යාපෘති සඳහා වන ඇතැම් අරමුදල් අහෝසි කිරීමට යෝජනා කර තිබෙනවා.

තවද රජයේ දේශගුණික විපර්යාස සඳහා වන ප්‍රතිපත්ති වෙනස් කිරීම මගින් ඩොලර් බිලියන 9.4ක් ඉතිරි කළ හැකි බවයි ඔවුන් පවසන්නේ.

හරිත ඇලුමිනියම්, හයිඩ්‍රජන් සහ අත්‍යවශ්‍ය ඛනිජ කර්මාන්ත සඳහා ලබාදෙන සහනාධාර අවසන් කිරීමෙන් තවත් ඩොලර් බිලියන 7.3ක් ඉතිරි කිරීමට හැකි බව විපක්ෂය අපේක්ෂා කරනවා.

පළමු නිවස මිලදී ගන්නා අයට සහාය දෙන Help to Buy වැඩසටහන සහ සමාජ නිවාස ඉදිකිරීම් ඇතුළු නිවාස වැඩසටහන් කිහිපයක් අහෝසි කිරීමෙන් තවත් ඩොලර් බිලියන 4.7ක් ඉතිරි කළ හැකි බවද ඔවුන් වැඩි දුරටත් පවසනවා.

ස්ථිර පදිංචිකරුවන් ඇතුළු ඕස්ට්‍රේලියානු පුරවැසියන් නොවන පුද්ගලයන්ට ඇතැම් සුබසාධන දීමනා සහ ජාතික ආබාධිත රක්ෂණ වැඩසටහන වන NDIS ලබාගැනීමේ සුදුසුකම් සීමා කිරීමෙන් වසර හතරකදී තවත් ඩොලර් බිලියන 2ක පමණ මුදලක් ඉතිරි කළ හැකි බව Coalition පක්ෂය සඳහන් කරනවා.

දුම්කොළ බද්ද අඩු කිරීම සහ විද්‍යුත් සිගරට් නීත්‍යානුකූල කිරීම සම්බන්ධ යෝජනා වලින්ද ඩොලර් බිලියන 7.9ක ඉතිරියක් ගණනය කර තිබෙන බව එම වියදම් කපාහැරීමේ යෝජනා ඉදිරිපත් කරමින් Angus Taylor සහ Tim Wilson පවසා තිබෙන බවයි වාර්තා වෙන්නේ.

රජයේ වියදම් ඉහළ යාම උද්ධමනයට හේතුවක් බවත් මෙම ඉතිරිකිරීම් යෝජනා තමන්ගේ ආදායම් බදු ප්‍රතිපත්තිය සඳහා මුදල් සපයා ගැනීමට උපකාරී වන බව විපක්ෂ නායකවරයා ප්‍රකාශ කර තිබෙනවා.

කෙසේ වෙතත්, භාණ්ඩාගාර අමාත්‍ය Jim Chalmers එම අදහස ප්‍රතික්ෂේප කරමින් රජය වගකීමෙන් අයවැය කළමනාකරණය කරන බව පවසා තිබෙන අතර දෙසැම්බර් මාසයේදී වියදම් අඩු කිරීම පිලිබඳ රජයේ ප්‍රතිපත්ති මාලාවක් ඉදිරපත් කිරීමට බලාපොරොත්තු වන බව සඳහන් කර තිබුනා.