2026 වසර සඳහා ආසියා පැසිෆික් කලාපයේ හොඳම අවන්හල් 100 අතරට වික්ටෝරියා ප්‍රාන්තයේ අවන්හල් තුනක් තේරී පත්ව තිබෙනවා.

Tatler Best Awards විසින් ප්‍රකාශයට පත් කළ මෙම ලැයිස්තුවට ඔස්ට්‍රේලියාවේ අවන්හල් පහක් ඇතුළත් වී ඇති අතර, ඉන් තුනක්ම වික්ටෝරියා ප්‍රාන්තයේ පිහිටා තිබීම විශේෂත්වයක්.

මෙල්බන් නගරයේ සුප්‍රසිද්ධ චීන අවන්හලක් වන Flower Drum මෙවරත් එම ලැයිස්තුවේ ස්ථානයක් හිමිකරගෙන ඇති අතර, වික්ටෝරියාවේ Birregurra ප්‍රදේශයේ පිහිටි Brae සහ මෙල්බන්හි Embla අවන්හල් පළමු වරට මෙම ගෞරවයට පාත්‍ර වී තිබෙනවා.

ආසියා පැසිෆික් කලාපය පුරා සිටින ආහාර විචාරකයන්, මාධ්‍යවේදීන් සහ සංචාරක ක්ෂේත්‍රයේ ප්‍රවීණයන් ඇතුළු 900කට අධික පිරිසකගේ ඇගයීම් මත මෙම අවන්හල් තෝරාගෙන තිබෙනවා.

මේ අතර මෙල්බන්හි Fitzroy Gardensහි පිහිටි Yiaga අවන්හල ආසියා පැසිෆික් කලාපයේ හොඳම නිර්මාණාත්මක සැලසුම සහිත අවන්හල ලෙස ද තේරී පත්වුණා.

1908 වසරේ ඉදිකළ ඓතිහාසික ගොඩනැගිල්ලක පිහිටි මෙම අවන්හල, අතින් නිර්මාණය කළ terracotta tiles 13,000කින් සහ ස්වභාවික පරිසරය දැකගත හැකි විශාල වීදුරු බිත්තිවලින් සමන්විතයි.

මෙම ජාත්‍යන්තර පිළිගැනීමත් සමඟ මෙල්බන් නගරය ලෝකයේ ප්‍රමුඛතම ආහාර සහ අවන්හල් සංස්කෘතියක් සහිත නගරයක් ලෙස තවදුරටත් අවධානයට ලක්ව තිබෙනවා.