ඔස්ට්‍රේලියාවේ වෛද්‍ය ක්ෂේත්‍රයේ නව තාක්ෂණික සන්ධිස්ථානයක් සනිටුහන් කරමින්, Sydney හි සිටින ශල්‍ය වෛද්‍යවරයෙකු China හි Shanghai නගරයේ පිහිටි ශල්‍ය රොබෝවක් දුරස්ථව පාලනය කර තිබෙනවා.

Chris O’Brien Lifehouse ආයතනයේ Associate Professor Ruban Thanigasalam විසින් සිදුකළ මෙම විශේෂ නිරූපණය සඳහා, ඔහු Sydney හි සිට කිලෝමීටර් 7,500ක් පමණ දුරින් පිහිටි රොබෝවක් භාවිත කර තිබුණා.

Toumai නමැති මෙම රොබෝ තාක්ෂණය යොදාගනිමින්, Shanghai හිදී වකුගඩුවක ආදර්ශ කොටසක් කැපීම සහ මැසීම ඔහු විසින් සිදුකර තිබීම විශේෂත්වයක්.

කෙසේ වෙතත්, මෙය සැබෑ රෝගියෙකුට සිදුකළ ශල්‍යකර්මයක් නොව, තාක්ෂණය ප්‍රදර්ශනය කිරීම සඳහා කළ නිරූපණයක් බව සඳහන්.

මෙම ක්‍රමය අනාගතයේදී භාවිතයට ගැනීමට හැකි වුවහොත්, විශේෂඥ ශල්‍ය වෛද්‍යවරුන්ගේ සේවාව ලබාගැනීම සඳහා දුර බැහැර ප්‍රදේශවල ජීවත් වන රෝගීන්ට විශාල නගර වෙත ගමන් කිරීමට ඇති අවශ්‍යතාව අඩු විය හැකියි.

මෙම රොබෝව ක්‍රියාත්මක කිරීම සඳහා 5G සන්නිවේදන ජාලය භාවිත කර ඇති අතර, සම්බන්ධතාවයේ වේගය සහ විශ්වසනීයත්වය පරීක්ෂා කිරීමද අත්‍යවශ්‍ය වනවා.

කෙසේ වෙතත්, ඔස්ට්‍රේලියාවේ රෝහල් තුළ මෙවැනි දුරස්ථ ශල්‍යකර්ම සාමාන්‍ය සේවාවක් ලෙස ආරම්භ කිරීමට පෙර, අදාළ අනුමැතීන්, නීතිමය පියවර සහ රෝගියා අසල සහායක වෛද්‍ය කණ්ඩායමක් සිටීම ඇතුළු අවශ්‍යතා සපුරාලිය යුතු බවයි වාර්තා වන්නේ.