ඔස්ට්‍රේලියාවේ ඉහළ යන නිවාස ණය වාරික හමුවේ, වසර 26කට ආසන්න කාලයක් තම පවුලේ නිවසේ ජීවත් වූ Sydney කාන්තාවකට එම නිවස විකිණීමට සිදුවිය හැකි තත්ත්වයක් උදා වී තිබෙනවා.

Vanessa Meriwether නම් මෙම කාන්තාව සතියකට ඩොලර් 900කට මඳක් වැඩි ආදායමක් උපයන අතර, ඉන් ඩොලර් 800ක් පමණ නිවාස ණය වාරිකය සඳහා වැය කරන බව සඳහන්.

COVID වසංගතය හේතුවෙන් ඇගේ ව්‍යාපාරයට සිදුවූ පාඩු සහ පසුව මුහුණ දීමට සිදුවූ සෞඛ්‍ය ගැටලු නිසා ඇගේ ඉතිරි මුදල් ක්‍රමයෙන් අවසන් වී තිබෙනවා.

බැංකුවෙන් සහනදායී ගෙවීම් සැලැස්මක් ලබාගෙන තිබුණත්, දෛනික වියදම් පියවා ගැනීම සඳහා ඇයට තමන් සතු භාණ්ඩ පවා විකිණීමට සිදුව ඇති බව වාර්තා වනවා.

තවත් පොලී අනුපාත ඉහළ දැමීමක් සිදුවුවහොත්, ලබන ජනවාරි මාසයේදී තම නිවස විකිණීමට සිදුවිය හැකි බවට ඇය බිය පළ කර තිබෙනවා.

මේ අතර, Reserve Bank of Australia සහකාර අධිපතිනී Sarah Hunter පෙන්වා දෙන්නේ, පවුල්වලට දැඩි පීඩනයක් එල්ල වුවද උද්ධමනය පාලනය කිරීම සඳහා පොලී අනුපාත භාවිත කිරීම අවශ්‍ය බවයි.

2029 වසර වන විට නව නිවාස මිලියන 1.2ක් ඉදිකිරීමේ ජාතික ඉලක්කය සපුරා ගැනීමට නොහැකි විය හැකි බවටද ඉදිකිරීම් ක්ෂේත්‍රයේ නියෝජිතයන් අනතුරු අඟවන අතර, නිවාස සැපයුම සහ දැරිය හැකි මිලකට නිවසක් පවත්වාගෙන යාමේ අභියෝගය ඔස්ට්‍රේලියාව තුළ තවදුරටත් උග්‍ර වෙමින් පවතිනවා.