ඔස්ට්‍රේලියාවේ වික්ටෝරියා ප්‍රාන්ත මැතිවරණය එළෙඹෙන නොවැම්බර් 28 වැනිදා පැවැත්වීමට නියමිතයි.

මෙම මැතිවරණය මඟින් ඉදිරි වසර හතර සඳහා ප්‍රාන්තය පාලනය කරන රජය තෝරා පත් කරගනු ලබනවා.

ඒ වෙනුවෙන් Melbourne නගරය ඇතුළු නාගරික සහ ප්‍රාදේශීය ප්‍රදේශවල ඡන්දදායකයන්ගේ සහාය දිනාගැනීමට ප්‍රධාන දේශපාලන පක්ෂ සිය ප්‍රචාරණ කටයුතු මේ වන විට සිදු කරමින් පවතින බවයි වාර්තා වෙන්නේ.

Ben Carrollගේ නායකත්වයෙන් යුත් Labour පක්ෂය අඛණ්ඩව සිව්වැනි වරටත් ප්‍රාන්තයේ බලය ලබාගැනීමේ අරමුණින් මැතිවරණයට ඉදිරිපත් වනවා.

මේ අතර, ලිබරල් පක්ෂ නායිකා Jess Wilsonගේ නායකත්වයෙන් යුත් Liberal – National සන්ධානය ප්‍රාන්තයේ පාලන බලය ලබාගැනීමට උත්සාහ කරනවා.

Warren Pickeringගේ නායකත්වයෙන් වික්ටෝරියා ප්‍රාන්තයේ ක්‍රියාත්මක වන One Nation පක්ෂයේ ඉදිරිපත්වීම ද මෙවර මැතිවරණයේ තවත් අවධානයට ලක්වන කරුණක් බවට පත්ව තිබෙනවා.

ජීවන වියදම, නිවාස මිල සහ දැරිය හැකි නිවාස පහසුකම්, අපරාධ, සෞඛ්‍ය සේවා, අධ්‍යාපනය, රැකියා සහ ප්‍රවාහන යටිතල පහසුකම් මෙවර මැතිවරණයේදී ඡන්දදායකයන්ගේ අවධානයට ලක්වන ප්‍රධාන කරුණු අතරට අයත් වන බවයි පැවසෙන්නේ.

වික්ටෝරියා ප්‍රාන්තයේ පහළ මන්ත්‍රී මණ්ඩලය වන ව්‍යවස්ථාදායක සභාවේ ආසන 88ක් පවතින අතර එහි බහුතර බලයක් ලබාගැනීම සඳහා අවම වශයෙන් ආසන 45ක් දිනාගත යුතුයි.

ඉහළ මන්ත්‍රී මණ්ඩලය වන ව්‍යවස්ථාදායක මණ්ඩලයේ සාමාජිකයන් 40 දෙනෙකු සිටින අතර, ඔවුන් ප්‍රාන්තයේ කලාප අටක් නියෝජනය කරමින් තේරී පත් වනවා.

ඡන්දය ප්‍රකාශ කිරීමට සුදුසුකම් ඇති පුද්ගලයන් සඳහා ඡන්දදායක ලියාපදිංචිය නොවැම්බර් 3 වැනිදා රාත්‍රී 8ට අවසන් වීමට නියමිතයි.

කලින් ඡන්දය ප්‍රකාශ කිරීම නොවැම්බර් 18 වැනිදා ආරම්භ වන අතර, ප්‍රධාන මැතිවරණ දිනය වන නොවැම්බර් 28 වැනිදා උදෑසන 8 සිට සවස 6 දක්වා ඡන්දය ප්‍රකාශ කළ හැකි බව සඳහන් වනවා.