ඔස්ට්‍රේලියාවේ දේශපාලන විවාදවලදී භාවිත කරන ප්‍රකෝපකාරී ප්‍රකාශ සහ පාර්ලිමේන්තු මන්ත්‍රීවරුන්ට එල්ල වන තර්ජන අතර සෘජු සම්බන්ධතාවක් පවතින බව ඔස්ට්‍රේලියානු ෆෙඩරල් පොලිස් කොමසාරිස් Krissy Barrett පවසනවා.

අද ABC රූපවාහිනියේ Insiders වැඩසටහනට එක්වෙමින් ඇය සඳහන් කළේ, දේශපාලන විවාද උණුසුම් වන අවස්ථාවලදී මන්ත්‍රීවරුන්ට එල්ල වන තර්ජන සහ අපහාසාත්මක ප්‍රකාශ ක්ෂණිකව ඉහළ යන බව පොලිසිය නිරීක්ෂණය කර ඇති බවයි.

විශේෂයෙන් One Nation පක්ෂය විසින් සමාජ මාධ්‍ය ඔස්සේ ප්‍රචාරය කරන ලද දේශපාලනඥයන් වාහනවල ගැටෙන ආකාරය දැක්වෙන කාටූන් සම්බන්ධයෙන් ද ඇයගෙන් ප්‍රශ්න කර ඇති අතර, එවැනි අන්තර්ගතයන්ට සමාජයෙන් ප්‍රතිචාර ඇතිවිය හැකි බවයි ඇය පෙන්වා දී ඇත්තේ.

වික්ටෝරියා ප්‍රාන්තයේ Wangaratta ප්‍රදේශයේදී ස්වාධීන ෆෙඩරල් මන්ත්‍රී Helen Haines මෝටර් රථ ප්‍රහාරයකට ලක්ව බරපතළ තුවාල ලැබීමෙන් අනතුරුව දේශපාලනඥයන්ගේ ආරක්ෂාව පිළිබඳ රට පුරා දැඩි අවධානයක් යොමුව තිබෙනවා.

එම ප්‍රහාරයෙන් ඇයගේ පාද දෙකම ඉවත් කිරීමට සිදුව ඇති අතර, සිද්ධිය සම්බන්ධයෙන් 43 හැවිරිදි Brendan Nugent නමැති පුද්ගලයෙකු අත්අඩංගුවට ගෙන චෝදනා ගොනු කර තිබෙනවා.

කෙසේ වෙතත්, මෙම ප්‍රහාරයට හේතුව මෙතෙක් නිශ්චිතව තහවුරු වී නොමැති අතර, එය මන්ත්‍රීවරියගේ දේශපාලන කටයුතු සමඟ සම්බන්ධද යන්න අනාවරණය කරගැනීම සඳහා විමර්ශන තවදුරටත් ක්‍රියාත්මක බවයි පොලිස් කොමසාරිස්වරිය පවසන්නේ.

පාර්ලිමේන්තු මන්ත්‍රීවරුන්ගේ ආරක්ෂාව සඳහා නව ක්‍රියාමාර්ග සලකා බලමින් සිටින බවත්, අදහස් ප්‍රකාශ කිරීමේ නිදහස ආරක්ෂා කරන අතරම ප්‍රචණ්ඩත්වයට සහ තර්ජනවලට එරෙහිව නීතිය ක්‍රියාත්මක කිරීම අත්‍යවශ්‍ය බවත් ඇය වැඩිදුරටත් සඳහන් කර තිබෙනවා.