වික්ටෝරියා සහ නිව් සවුත් වේල්ස් ප්‍රාන්ත ඇතුළු ප්‍රදේශ රැසකට අධික වැසි, ගිගුරුම් සහිත කුණාටු සහ තද සුළං ඇතිවිය හැකි බවට කාලගුණ අනතුරු ඇඟවීම් නිකුත් කර තිබෙනවා.

කාලගුණ විද්‍යා කාර්යාංශයේ වාර්තාවට අනුව මෙල්බන් නගරයට මිලිමීටර් 40ක් දක්වා වැසි අපේක්ෂා කරන අතර, මධ්‍යම රාත්‍රියේ සිට මේ දක්වා මිලිමීටර් 17කට ආසන්න වර්ෂාපතනයක් ලැබී ඇති බව සඳහන්.

මෙම අධික වර්ෂාව හේතුවෙන් මෙල්බන් නගරයේ දකුණු ප්‍රදේශ ඇතුළු ස්ථාන කිහිපයක හදිසි ගංවතුර තත්ත්වයන් ඇතිවිය හැකි අතර, ජලයෙන් යටවූ මාර්ගවල රිය ධාවනය නොකරන ලෙසයි ජනතාවට උපදෙස් ලබාදී ඇත්තේ.

වික්ටෝරියා ප්‍රාන්තයේ ඊසානදිග කඳුකර ප්‍රදේශවල පැයට කිලෝමීටර් 90ක් දක්වා වේගයෙන් සුළං හමා යා හැකි බවට ද අනතුරු ඇඟවීම් නිකුත් කර තිබෙනවා.

මේ අතර, තද සුළං සහ ඉහළ තෘණ පරාග මට්ටම් හේතුවෙන් නැගෙනහිර ගිප්ස්ලන්ඩ් ප්‍රදේශයේ ගිගුරුම් සහිත කුණාටු ආශ්‍රිත ඇදුම රෝගී තත්ත්වයන් ඉහළ යාමේ අවදානමක් පවතින බව සෞඛ්‍ය බලධාරීන් පෙන්වා දෙනවා.

නිව් සවුත් වේල්ස් ප්‍රාන්තයේ සිඩ්නි නගරයට ද ගිගුරුම් සහිත වැසි ඇතිවිය හැකි අතර, Snowy Mountains ප්‍රදේශයට මිලිමීටර් 60ක් දක්වා වර්ෂාපතනයක් අපේක්ෂා කරනවා.

ක්වීන්ස්ලන්ඩ් ප්‍රාන්තයේ බ්‍රිස්බන් නගරයට මිලිමීටර් 45ක් දක්වා වැසි ඇතිවිය හැකි බැවින්, කාලගුණ අනතුරු ඇඟවීම් පිළිබඳ අවධානයෙන් සිටින ලෙසයි ජනතාවට දැනුම් දී ඇත්තේ.