ඔස්ට්‍රේලියාවේ ස්ථිර පදිංචිය ලබාගැනීම සඳහා ක්‍රියාත්මක Employer Nomination Scheme හෙවත් Subclass 186 වීසා වැඩසටහන යටතේ සේවායෝජකයා ඉදිරිපත් කරන නාමයෝජනාව ප්‍රතික්ෂේප වුවද, අයදුම්කරුවන්ට තවදුරටත් විකල්ප ක්‍රියාමාර්ග කිහිපයක් පවතින බව සංක්‍රමණ නීති විශේෂඥයන් පෙන්වා දෙනවා.

ඔස්ට්‍රේලියානු සංක්‍රමණ නීති සමාගමක් වන Hannan Tew Immigration Lawyers විසින් ප්‍රකාශයට පත්කළ නව පැහැදිලි කිරීමකට අනුව, නාමයෝජනාවක් ප්‍රතික්ෂේප වූ අවස්ථාවක Administrative Review Tribunal හෙවත් ART වෙත අභියාචනයක් ඉදිරිපත් කිරීමට අවස්ථාව තිබිය හැකියි.

එසේම පවතින වීසා අයදුම්පත ඉල්ලා අස්කරගෙන නව සේවායෝජක නාමයෝජනාවක් සහ නව වීසා අයදුම්පතක් ඉදිරිපත් කිරීමේ හැකියාවද ඇතැම් අයදුම්කරුවන්ට පවතිනවා.

විශේෂිත තත්ත්වයන් යටතේ ART සමාලෝචනයක් ඉල්ලා සිටින අතරතුරම නව නාමයෝජනාවක් සහ වීසා අයදුම්පතක් ඉදිරිපත් කිරීමට ද හැකියාව තිබිය හැකි බව නීති විශේෂඥයන් සඳහන් කරනවා.

සාමාන්‍යයෙන් නාමයෝජනාවක් ප්‍රතික්ෂේප වූ විට ඒ සඳහා අනුමැතියක් නොමැතිව අදාළ 186 වීසා අනුමත කළ නොහැකි අතර, වීසා අයදුම්පත සම්බන්ධයෙන් අවසන් තීරණයක් ගැනීමට පෙර ස්වදේශ කටයුතු දෙපාර්තමේන්තුව විසින් කරුණු දැක්වීමට අවස්ථාවක් ලබාදෙන ලිපියක් නිකුත් කළ හැකියි.

නාමයෝජනා ප්‍රතික්ෂේප වීමට ප්‍රධාන හේතු අතර රැකියා තනතුරේ සැබෑ අවශ්‍යතාව ප්‍රමාණවත් ලෙස තහවුරු නොකිරීම, රැකියා වර්ගීකරණයේ ගැටලු, වැටුප් සම්බන්ධ අඩුපාඩු සහ සේවායෝජකයාගේ ව්‍යාපාරික තොරතුරු පිළිබඳ ගැටලු ඇතුළත් වනවා.

කෙසේ වෙතත්, නව අයදුම්පතක් ඉදිරිපත් කිරීමේදී නැවත ගාස්තු ගෙවීමට සිදුවිය හැකි අතර, පවතින වීසා අයදුම්පත ඉල්ලා අස්කරගැනීමෙන් Bridging Visa තත්ත්වයට සහ ඔස්ට්‍රේලියාවේ රැඳී සිටීමේ අයිතියට බලපෑම් ඇතිවිය හැකි බැවින් නීති උපදෙස් ලබාගෙන තීරණ ගැනීම වැදගත් බවයි විශේෂඥයන් පෙන්වා දෙන්නේ.