ඔස්ට්‍රේලියාවේ විදුලි ඉල්ලුම වාර්තාගත ලෙස ඉහළ ගොස් තිබියදීත්, තොග විදුලි වෙළෙඳපොළේ මිල ගණන් (Wholesale electricity prices) සියයට 27කින් පහත වැටී ඇති බව නවතම වාර්තාවකින් අනාවරණය වී තිබෙනවා.

Australian Energy Market Operator (AEMO) නිකුත් කළ වාර්තාවට අනුව, ජූලි සිට සැප්තැම්බර් දක්වා කාලය තුළ තොග විදුලි මිල පසුගිය වසරේ එම කාලයට සාපේක්ෂව සියයට 27කින් සහ ඊට පෙර කාර්තුවට සාපේක්ෂව සියයට 15කින් පහළ ගොස් තිබෙනවා.

නිවාසවල සූර්ය පැනල, සුළං බලාගාර, මහා පරිමාණ සූර්ය බලශක්ති ව්‍යාපෘති සහ බැටරිවල බලශක්තිය ගබඩා කිරීමේ පහසුකම් ඉහළ යාම මෙම මිල අඩුවීමට ප්‍රධාන හේතු ලෙස හඳුනාගෙන තිබෙනවා.

විශේෂයෙන් දිවා කාලයේ නිපදවන අතිරික්ත සූර්ය බලශක්තිය බැටරිවල ගබඩා කර සවස් කාලයේ වැඩි විදුලි ඉල්ලුමක් පවතින අවස්ථාවල භාවිත කිරීමෙන් විදුලි මිල සැලකිය යුතු ලෙස පහත වැටී ඇති බවයි බලශක්ති බලධාරීන් පෙන්වා දෙන්නේ.

මේ අතර, අදාළ මාස තුන තුළ වික්ටෝරියා ප්‍රාන්තයේ විදුලි පරිභෝජනය කැපී පෙනෙන ලෙස ඉහළ ගොස් ඇති අතර, කර්මාන්ත ක්ෂේත්‍රයේ ඉල්ලුම සහ data centresවල විදුලි භාවිතය වැඩිවීම ඊට ප්‍රධාන හේතුවයි.

නව දත්ත අනුව, සූර්ය පැනල සහ බැටරි පද්ධති දෙකම ඇති නිවාස, සූර්ය පැනල පමණක් ඇති නිවාසවලට සාපේක්ෂව සවස් කාලයේ ජාතික විදුලි ජාලයෙන් ලබාගන්නා විදුලි ප්‍රමාණය සියයට 75කින් පමණ අඩු කරගෙන ඇති අතර, ගෑස් භාවිතයෙන් විදුලිය නිෂ්පාදනය කිරීම ද සියයට 34කින් පහත වැටී තිබෙනවා.

කෙසේ වෙතත්, මෙම මිල අඩුවීම තොග විදුලි වෙළෙඳපොළට අදාළ වන අතර, එම ප්‍රතිලාභ නිවාසවල විදුලි බිල්පත්වලට සෘජුවම හෝ එම ප්‍රමාණයෙන්ම ලැබෙන බවට සහතිකයක් නොමැති බව ද සඳහන් වනවා.