Halloween උත්සවය සැමරීමට සූදානම් වන ඔස්ට්‍රේලියානුවන්ට තම ඇඳුම් සඳහා තෝරාගන්නා අමතර උපාංග පිළිබඳව සැලකිලිමත් වන ලෙස නීතී බලධාරීන් අනතුරු අඟවා තිබෙනවා. විශේෂයෙන්ම, සැබෑ ගිනිඅවිවලට සමාන පෙනුමක් ඇති සෙල්ලම් තුවක්කු සහ වෙනත් අනුකරණ ආයුධ රැගෙන යාම නීතිමය ගැටලුවලට හේතු විය හැකි බව ඔවුන් පෙන්වා දෙනවා.

Astor Legal නීති ආයතනයේ ප්‍රධාන නීතිඥ Avinash Singh පවසන්නේ, Halloween ඇඳුම් අලෙවි කරන සාමාන්‍ය වෙළඳසැලකින් හෝ අන්තර්ජාලයෙන් මිලදී ගත් භාණ්ඩයක් වුවද එය නීති විරෝධී අනුකරණ ආයුධයක් ලෙස සැලකිය හැකි බවයි. සැබෑ තුවක්කුවකට සමාන හැඩයක් සහ පෙනුමක් ඇති සෙල්ලම් තුවක්කු පොදු ස්ථානවල රැගෙන යාම අවදානම් සහගත බව ඔහු පවසනවා. එවැනි තුවක්කුවක් සෙල්ලම් බඩුවක් ලෙස පැහැදිලිව හඳුනාගත නොහැකි නම්, එය ළඟ තබාගැනීම හෝ රැගෙන යාම නිසා නීතිමය ක්‍රියාමාර්ගවලට මුහුණ දීමට සිදුවිය හැකි බව ද ඔහු වැඩිදුරටත් පෙන්වා දෙනවා.

ඔස්ට්‍රේලියාවේ ප්‍රාන්ත සහ ප්‍රදේශ අනුව මෙවැනි වැරදි සඳහා පනවන දඬුවම් වෙනස් වන අතර Victoria ප්‍රාන්තයේ අවසරයකින් තොරව අනුකරණ ගිනිඅවියක් සන්තකයේ තබාගැනීම සඳහා වසර දෙකක් දක්වා සිරදඬුවමක් හෝ ඔස්ට්‍රේලියානු ඩොලර් 50,000ක දඩයක් පැනවිය හැකි බව ද වාර්තා වෙනවා.

NSW ප්‍රාන්තයේ ඇතැම් අනුකරණ ගිනිඅවි සම්බන්ධ වැරදි සඳහා වසර පහක් දක්වා සිරදඬුවම් ලැබිය හැකි අතර, ඇතැම් පිස්තෝල හෝ තහනම් ගිනිඅවිවලට සමාන අනුකරණ සම්බන්ධයෙන් එය වසර 14ක් දක්වා ඉහළ යා හැකි බව ද සදහන්. අනෙකුත් ප්‍රාන්තවල ද අදාළ නීති උල්ලංඝනය කිරීම අනුව දඩ සහ සිරදඬුවම් පනවනු ලබනවා.

කෙසේ වෙතත්, දීප්තිමත් වර්ණවලින් යුත් හෝ ප්ලාස්ටික් සෙල්ලම් බඩුවක් බව පැහැදිලිව හඳුනාගත හැකි ආයුධ වැනි උපාංග සම්බන්ධයෙන් නීතිමය තත්ත්වය වෙනස් විය හැකි බව නීතිඥවරයා පවසනවා. ඒ අනුව, Halloween ඇඳුම් සඳහා මෙවැනි උපාංග තෝරාගැනීමේදී ඒවා සැබෑ ආයුධ ලෙස වරදවා වටහා නොගන්නා බවට වගබලා ගැනීම වැදගත් වනවා.

මේ අතර, පුද්ගලයන්ගේ අනන්‍යතාව තහවුරු කරගැනීම සඳහා ඇතැම් අවස්ථාවලදී මුහුණු ආවරණ ඉවත් කරන ලෙස පොලිසිය ඉල්ලා සිටිය හැකි බව ද ඔහු පෙන්වා දෙනවා. මෙම නීති සහ ඒවා උල්ලංඝනය කිරීම සඳහා පනවන දඬුවම් ප්‍රාන්තයෙන් ප්‍රාන්තයට වෙනස් වන බැවින්, හැලොවීන් උත්සවයට සහභාගී වීමට සූදානම් වන පුද්ගලයන් තමන් සිටින ප්‍රදේශයේ නීති පිළිබඳව දැනුවත්ව සිටීම වැදගත් වනවා.