ඔස්ට්‍රේලියාවේ නිෂ්පාදිත Bushmaster සන්නද්ධ හමුදා රථය, සතුරු ඩ්‍රෝන යානා විනාශ කිරීමට සහ කිලෝමීටර් 100ක් දුරින් පිහිටි ඉලක්ක වෙත ප්‍රහාර එල්ල කිරීමට හැකි වන පරිදි නවීකරණය කිරීමේ සැලසුමක් ඉදිරිපත් කර තිබෙනවා. මේ සඳහා ඔස්ට්‍රේලියානු ආරක්ෂක සමාගමක් වන Thales Australia සහ ජර්මානු ආයුධ නිෂ්පාදන සමාගමක් වන STARK එක්ව කටයුතු කිරීමට සැලසුම් කර ඇති බවයි සදහන්.

මෙම නවීකරණය යටතේ සතුරු ඩ්‍රෝන යානා හඳුනාගෙන විනාශ කළ හැකි RapidStriker නමැති ගුවන් ආරක්ෂක පද්ධතියක් රථයට එක් කිරීමේ හැකියාව පවතිනවා. රේඩාර් සහ සංවේදක භාවිතයෙන් ගුවනේ පවතින තර්ජන හඳුනාගෙන ඒවාට ඉක්මනින් ප්‍රතිචාර දැක්වීමට එම පද්ධතියට හැකි බවයි සදහන්.

මීට අමතරව, STARK සමාගමේ Cascade ප්‍රහාරක ඩ්‍රෝන යානා ද Bushmaster රථයට සම්බන්ධ කිරීමට සැලසුම් කර තිබෙනවා. එමඟින් කිලෝමීටර් 100ක් දක්වා දුරකින් පිහිටි ඉලක්ක වෙත නිරවද්‍ය ප්‍රහාර එල්ල කිරීමේ හැකියාව අපේක්ෂා කරන බවයි පැවසෙන්නේ.

Cascade ඩ්‍රෝන යානයකට මිනිත්තු 60ක් දක්වා ගුවනේ රැඳී සිටීමටත්, පැයට කිලෝමීටර් 220ක පමණ වේගයකින් ගමන් කිරීමටත් හැකි බව එම සමාගම තවදුරටත් පවසා සිටිනවා.

මෙම නව තාක්ෂණය ඔස්ට්‍රේලියාවේ පර්ත් නුවර පැවති Land Forces ආරක්ෂක ප්‍රදර්ශනයේදී ප්‍රදර්ශනය කර තිබෙනවා.

මේ අතර, නව Bushmaster රථ 268ක් මිලදී ගැනීම සඳහා ඔස්ට්‍රේලියානු රජය ඩොලර් මිලියන 750ක ආයෝජනයක් ප්‍රකාශයට පත් කර ඇති අතර එමඟින් Bendigo හි පිහිටි නිෂ්පාදනාගාරයේ නිෂ්පාදන කටයුතු තවත් වසර හතක් පවත්වාගෙන යාමටත්, රැකියා 300ක් පමණ තවදුරටත් පවත්වා ගැනීමටත් බලාපොරොත්තු වෙන බවයි සදහන්.

කෙසේ වෙතත්, මෙම නව අවි පද්ධති ඔස්ට්‍රේලියානු හමුදාව විසින් මිලදී ගන්නේද, නැතහොත් අලුතින් ඇණවුම් කළ Bushmaster රථ සඳහා ඒවා සවි කරන්නේද යන්න මෙතෙක් තහවුරු කර නැහැ.