ඔස්ට්‍රේලියාවේ Melbourne නගරයේ වෛද්‍ය මධ්‍යස්ථානයකට ගිනි තැබීමක් සිදුකිරීම සම්බන්ධයෙන් Victoria Police විමර්ශන ආරම්භ කර තිබෙනවා.

අද අලුයම 2ට පමණ Moonee Pondsහි Shuter Street ප්‍රදේශයේ පිහිටි Moonee Vale Clinic මධ්‍යස්ථානයට මෙම ප්‍රහාරය එල්ල වී ඇති බවයි වාර්තා වන්නේ.

සැකකරුවන් මධ්‍යස්ථානයේ ඉදිරිපස වීදුරුව බිඳ දමා ගිනි ඇවිළවීමට උපකාරී වන ද්‍රව්‍යයක් යොදා ගින්න ඇති කර තිබෙනවා.

ගින්න හේතුවෙන් වෛද්‍ය මධ්‍යස්ථානයේ අභ්‍යන්තරයට දැඩි හානි සිදුව ඇති අතර, මීට පෙර එම ස්ථානයට යාබද රූපලාවණ්‍යාගාරයකටත් ගිනි තැබීමක් සිදුව තිබීම හේතුවෙන් සිදුවීම් දෙක අතර සම්බන්ධයක් තිබේද යන්න පිළිබඳවද පොලිසිය පරීක්ෂණ පවත්වනවා.

මේ අතර, Melbourneහි Brighton ප්‍රදේශයේ Manor Streetහි පිහිටි නිවසක් ඉදිරිපිටත් අද අලුයම 1.20ට පමණ මෝටර් රථ දෙකක් ගිනි තබා තිබෙනවා.

එම සිදුවීමට පෙර සැකකරුවන් නිවසේ ඉදිරි ගේට්ටුවට වාහනයකින් ගැටී, නිවස දෙසට සහ නවතා තිබූ මෝටර් රථ දෙක මතට ගිනි ඇවිළවීමට උපකාරී වන ද්‍රව්‍යයක් වත්කර ඇති බවට පොලිසිය සැක පළ කරනවා.

සිදුවීම් දෙක සම්බන්ධයෙන්ම විමර්ශන ක්‍රියාත්මක වන අතර, ඒ පිළිබඳ තොරතුරු හෝ ඩෑෂ් කැම් දර්ශන ඇති පුද්ගලයන්ගෙන් Crime Stoppers වෙත දැනුම් දෙන ලෙස පොලිසිය ඉල්ලා සිටිනවා.