ඔස්ට්‍රේලියානු පාර්ලිමේන්තු මන්ත්‍රීවරියක වන Helan Hainesට එල්ල වූ ඉලක්කගත මෝටර් රථ ප්‍රහාරයකින් ඇයගේ පාද දෙකම අහිමි වීමෙන් පසු, ඇයට සහ ඇගේ පවුලේ සාමාජිකයන්ට සහාය පළ කරමින් ඔස්ට්‍රේලියානු පාර්ලිමේන්තුවේදී සංවේදී උපහාරයක් පිරිනමා තිබෙනවා.

පසුගිය සතියේ වික්ටෝරියා ප්‍රාන්තයේ Wangaratta ප්‍රදේශයේ පිහිටි සිය කාර්යාලය අසලදී මෙම ප්‍රහාරයට මුහුණ දුන් ඇය වෙනුවෙන් ඊයේ (26) පැවති පාර්ලිමේන්තු සැසියේදී මන්ත්‍රීවරුන් රැසක් අදහස් පළ කර සිටියා.

අග්‍රාමාත්‍ය Anthony Albanese ඇතුළු මන්ත්‍රීවරුන් Helen Hainesගේ සේවය අගය කළ අතර, ඇයගේ හිස් වූ අසුනේ තැඹිලි පැහැති කාඩ්බෝඩ් Cockatoo කුරුල්ලෙකුගේ අනුරුවක් තබා තිබුණා. Victoria හි ඊසානදිග ප්‍රදේශයට ආවේණික මෙම කුරුල්ලා තෝරාගැනීමෙන්, Helenගේ ප්‍රජාව සමඟ ඇති සමීප බැඳීම සහ එකමුතුකම සංකේතාත්මකව සිහිපත් කර තිබෙනවා.

අනතුර සිදු වූ අවස්ථාවේදී Helenට සහාය වීමට ඉදිරිපත් වූ ප්‍රදේශවාසීන්ගේ ධෛර්යය ද මෙහිදී ඇගයීමට ලක් වූ අතර, ඔවුන්ගේ මැදිහත්වීම ඇගේ ජීවිතය බේරා ගැනීමට උපකාරී වූ බව මන්ත්‍රීවරුන් එහිදී සඳහන් කර සිටියා.

එමෙන්ම, දේශපාලන මතභේද ප්‍රචණ්ඩත්වයට හෝ පුද්ගලික වෛරයට හැරවීම වැළැක්වීමේ අවශ්‍යතාව අවධාරණය කළ මන්ත්‍රීවරුන්, ප්‍රජාතන්ත්‍රවාදය තුළ විවිධ මතවලට ගරු කරමින් වඩාත් සාමකාමී සහ ගෞරවනීය සංවාදයක් පවත්වාගෙන යාමේ වැදගත්කම ද පෙන්වා දුන්නා.