ඔස්ට්‍රේලියාවේ Perth ගුවන් තොටුපළ ඩොලර් බිලියන 3ක වියදමින් නවීකරණය කිරීමට සැලසුම් කර තිබෙනවා.

ඒ හේතුවෙන් ඉදිරි වසර පහේ සිට හය දක්වා කාලය තුළ ගුවන් මගීන්ට ප්‍රමාදයන් සහ අපහසුතාවලට මුහුණ දීමට සිදුවිය හැකි බවටයි අනතුරු අඟවා ඇත්තේ.

මෙම දැවැන්ත සංවර්ධන ව්‍යාපෘතිය යටතේ නව Airport Central පර්යන්තයක්, අලුත් ගුවන් ධාවන පථයක්, මහල් කිහිපයකින් යුත් car parks දෙකක් සහ airport hotel එකක් ඉදිකිරීමට නියමිතයි.

දැනට Perth ගුවන් තොටුපළේ වෙනම පර්යන්තවලින් ක්‍රියාත්මක වන Qantas සහ Jetstar ගුවන් සේවා 2031 වසර වනවිට නව මධ්‍යම පර්යන්තයට ගෙන ඒමට සැලසුම් කර තිබෙනවා.

මෙම සංවර්ධන කටයුතු හේතුවෙන් ගුවන් මගීන්ට ප්‍රමාදයන් සහ විවිධ අපහසුතා ඇතිවිය හැකි නමුත්, ඉදිකිරීම් සිදුකරන සම්පූර්ණ කාලය පුරාම ගුවන් තොටුපළ පැය 24 පුරා විවෘතව තබන බවයි Perth Airport ප්‍රධාන විධායක නිලධාරී Jason Waters පවසන්නේ.

සංවර්ධන ව්‍යාපෘතිය අවසන් වීමෙන් පසු වාර්ෂිකව Perth නගරයට පැමිණෙන සහ පිටත්ව යන ගුවන් මගී ආසන ධාරිතාව මිලියන 4.4කින් ඉහළ නැංවීමට අපේක්ෂිතයි.

මේ අතර අද ආරම්භ වූ නවසීලන්තයේ Christchurch සිට Perth දක්වා Jetstar සෘජු ගුවන් සේවාව 2027 මාර්තු 27 දක්වා සතියකට තුන්වරක් ක්‍රියාත්මක කිරීමට නියමිතයි.

ජපානයේ Tokyo සහ නවසීලන්තය සමඟ පුළුල් කරන ලද ගුවන් සේවා හරහා බටහිර ඔස්ට්‍රේලියාවේ සංචාරක කර්මාන්තය සහ ආර්ථිකය තවදුරටත් ශක්තිමත් වනු ඇතැයි ප්‍රාන්ත රජය අපේක්ෂා කරනවා.

කෙසේ වෙතත්, මෙම ව්‍යාපෘතිය සැලසුම් කළ ඩොලර් බිලියන 3ක මුදල තුළ සහ 2031 වසර වනවිට අවසන් කළ හැකිද යන්න මෙතෙක් නිශ්චිතව තහවුරු කර නැහැ.