ඔස්ට්‍රේලියාවේ 2025 වසරේ වාර්තා වූ මරණවලින් 10%කට වැඩි ප්‍රමාණයකට හේතුව ඩිමෙන්ෂියා රෝගී තත්ත්වය බව Australian Bureau of Statistics පවසනවා.

එම වසරේදී ඩිමෙන්ෂියා සහ ඇල්සයිමර් යන රෝග හේතුවෙන් පුද්ගලයන් 19,000කට වැඩි පිරිසක් මියගොස් ඇති අතර, 2024 වසරේ සිට ඩිමෙන්ෂියා රෝගී තත්වය ඔස්ට්‍රේලියාවේ මරණ සඳහා ප්‍රධානතම හේතුව බවට පත්ව තිබෙනවා.

ඔස්ට්‍රේලියාවේ සමස්ත මරණ සංඛ්‍යාව 2025 වසරේදී 188,421ක් ලෙස වාර්තා වී ඇති අතර, මරණ සඳහා දෙවැනි ප්‍රධානතම හේතුව වී ඇත්තේ හෘදයට රුධිරය සැපයීම අඩාල වීමෙන් ඇති වන හෘද රෝගයි.

මරණ සඳහා ප්‍රධානතම හේතු පහ අතරට මොළයේ රුධිර නාල ආශ්‍රිත රෝග, පෙනහළු පිළිකා සහ දිගුකාලීන ශ්වසන රෝග ද ඇතුළත් වන අතර, එම රෝග පහට සමස්ත මරණවලින් තුනෙන් එකක් පමණ අයත් වෙනවා.

මේ අතර, 2025 වසරේදී ඔස්ට්‍රේලියාවේ සියදිවි නසාගැනීම් හේතුවෙන් පුද්ගලයන් 3,283ක් මියගොස් තිබෙනවා. එය පෙර වසරට සාපේක්ෂව සුළු අඩුවීමක් වන අතර, එම මරණවලින් 73.9%ක් පිරිමි පුද්ගලයන් බවයි වාර්තා වන්නේ.

කෙසේ වෙතත්, ආදිවාසී සහ Torres Straitහි දූපත්වාසී ජනතාව අතර සියදිවි නසාගැනීම් ඉහළ ගොස් ඇති අතර, එම කණ්ඩායමෙන් වාර්තා වූ මරණ සංඛ්‍යාව 320ක් ලෙස සටහන් වී තිබෙනවා.

එමෙන්ම, මත්ද්‍රව්‍ය භාවිතය හේතුවෙන් සිදුවූ මරණ සංඛ්‍යාව ද 2024 වසරේ 2,007 සිට 2025 වසරේදී 2,063 දක්වා ඉහළ ගොස් තිබෙනවා.

කෙසේ වෙතත්, සමස්තයක් ලෙස ඔස්ට්‍රේලියාවේ මරණ අනුපාතය අඩු වී ඇති අතර, එය කොවිඩ් වසංගතයට පෙර පැවති මට්ටමට යළි ළඟා වෙමින් පවතින බවයි ABS ආයතනය පෙන්වා දෙන්නේ.