ඔස්ට්‍රේලියානුවන්ගේ විශ්‍රාමික ඉතුරුම් ලෙස පවතින ඔස්ට්‍රේලියානු ඩොලර් ට්‍රිලියන 4.8ක මුදලට බලපෑම් එල්ල විය හැකි අවදානම් පහක් පිළිබඳව The Reserve Bank of Australia අනතුරු අඟවා තිබෙනවා. ගෝලීය යුධමය තත්ත්වයන්, AI ආශ්‍රිත ආයෝජනවල ඇති විය හැකි පසුබෑම, සයිබර් ප්‍රහාර, මූල්‍ය සේවා සපයන ආයතනවල පද්ධති බිඳවැටීම් සහ විශ්‍රාම යන ජනගහනය ඉහළ යාම ඒ අතරට අයත් වෙනවා.

AI තාක්ෂණය සම්බන්ධ සමාගම්වලට විශාල මුදලක් ආයෝජනය කර ඇති බැවින්, එම ආයෝජන පිළිබඳ අපේක්ෂාවන් බිඳවැටුණහොත් වෙළෙඳපොළේ විශාල පසුබෑමක් ඇති විය හැකි බවයි බලධාරීන් පෙන්වා දෙන්නේ. එමෙන්ම, AI භාවිතයෙන් හැකර්වරුන්ට පරිගණක පද්ධතිවල දුර්වලතා හඳුනාගෙන සයිබර් ප්‍රහාර එල්ල කිරීම පහසු වී තිබෙනවා. පසුගිය වසරේ අප්‍රේල් මාසයේදීත් වෙළෙඳපොළේ පසුබෑමක් මධ්‍යයේ ඔස්ට්‍රේලියාවේ විශ්‍රාමික ගිණුම්වලට සයිබර් ප්‍රහාර එල්ල වී තිබුණා.

ඔස්ට්‍රේලියාවේ විශ්‍රාම යන පුද්ගලයන්ගේ සංඛ්‍යාව ඉහළ යාමත් සමඟ, විශ්‍රාම අරමුදල්වලින් මුදල් ලබාගන්නා පිරිස වැඩි වෙමින් පවතිනවා. එවැනි අවස්ථාවක කොටස් වෙළෙඳපොළත් කඩා වැටුණහොත්, මුදල් ලබාදීම සඳහා අරමුදල්වලට තමන් සතු ආයෝජන අඩු මිලට විකිණීමට සිදුවිය හැකි බවයි අනතුරු අගවන්නේ. එමඟින් විශ්‍රාම අරමුදල්වලට පාඩු සිදුවීමේ අවදානමක් පවතිනවා.

කෙසේ වෙතත්, RBA ආයතනය පවසන්නේ සිදුකළ පරීක්ෂණවලට අනුව, වත්මන් විශ්‍රාමික ඉතුරුම් පද්ධතියට විශාල මූල්‍ය අර්බුදයකට මුහුණ දීමේ හැකියාවක් පවතින බවයි. නමුත් කොටස් වෙළෙඳපොළ කඩා වැටීමක්, සයිබර් ප්‍රහාරයක් සහ මූල්‍ය සේවා පද්ධති බිඳවැටීමක් එකවර සිදුවුවහොත්, විශ්‍රාමිකයන්ගේ මුදල් ආරක්ෂා කරමින් අවශ්‍ය ගෙවීම් සිදු කිරීම වඩාත් අසීරු විය හැකි බවටත් අනතුරු අඟවා තිබෙනවා.