ඔස්ට්‍රේලියාවේ නව යොවුන් වියේ පසුවන දරුවන් පවා අන්තර්ජාලය හරහා අන්තවාදී අදහස්වලට යොමු වෙමින් සිටින බවට Australian Federal පොලිසිය අනතුරු අඟවා තිබෙනවා.

වයස අවුරුදු 12ත් 17ත් අතර අන්තවාදයට යොමු වූ දරුවන් 55 දෙනෙකු පිළිබඳව සිදුකළ විශ්ලේෂණයකදී ඔවුන් සියලු දෙනාම පිරිමි දරුවන් වූ බවත්, එම දරුවන් සම්පූර්ණයෙන් හෝ අර්ධ වශයෙන් අන්තර්ජාලය හරහා අන්තවාදී අදහස්වලට යොමු වී තිබූ බවත්, පොලිස් ප්‍රධානී Krissy Barrett පාර්ලිමේන්තු කමිටුවකට ඉදිරිපත් කළ වාර්තාවක සදහන්.

මෙම දරුවන් අතර ප්‍රචණ්ඩ ජිහාඩ්වාදී අදහස් වඩාත් ප්‍රචලිතව පැවති අතර, ඊට අමතරව රාජ්‍ය විරෝධී මතවාද මෙන්ම සුදු ජාතික ආධිපත්‍යවාදී මතවාදත් දක්නට ලැබී තිබෙනවා. එමෙන්ම, කිසිදු පැහැදිලි මතවාදයක් නොමැති දරුවන් ද ඒ අතර සිටීම විශේෂත්වයක්.

අන්තවාදයට යොමු වන දරුවන් සියලු දෙනාම අස්ථාවර පවුල් පසුබිමකින් පැමිණෙන බවට පැවති අදහස ද මෙම අධ්‍යයනයෙන් අභියෝගයට ලක්ව ඇති අතර, ස්ථාවර පවුල් පසුබිමක් සහ දෙමාපියන් සමඟ සමීප සබඳතා ඇති දරුවන් ද අන්තර්ජාලය හරහා මෙලෙස බලපෑමට ලක්විය හැකි බවයි එම වාර්තාවෙන් පෙන්වා දෙන්නේ.

අධ්‍යයනයට ලක් කළ දරුවන්ගෙන් හතරෙන් එකකට වැඩි පිරිසකට ජීවිතයට මඟපෙන්වන පිරිමි ආදර්ශ චරිතයක් නොසිටි අතර, තුනෙන් එකකට ආසන්න පිරිසක් තමන්ව රැකබලා ගන්නා පුද්ගලයන්ගෙන් සිදුවූ ප්‍රචණ්ඩත්වය දැකීමට හෝ ඊට සෘජුවම මුහුණ දීමට සිදුව තිබෙනවා.

අන්තර්ජාලය හරහා පැතිරෙන වෛරී අදහස් සහ තාක්ෂණයේ වේගවත් ව්‍යාප්තිය හේතුවෙන් අන්තවාදී අදහස් සැබෑ ලෝකයේ ප්‍රචණ්ඩ ක්‍රියාවලට පවා මඟ පෑදිය හැකි බවට ඔස්ට්‍රේලියානු පොලිසිය තවදුරටත් අනතුරු අඟවා තිබෙනවා.