වික්ටෝරියා ප්‍රාන්තයේ Wallan ප්‍රදේශයේ 15 හැවිරිදි දැරියක් අතුරුදන්ව ඇති බවට Social Media ඔස්සේ තොරතුරු පළවී තිබෙනවා.

Krishleen Kaur නමැති මෙම දැරිය පසුගිය ඔක්තෝබර් 23 වැනි සිකුරාදා සිට අතුරුදන්ව සිටින බවයි එම පණිවිඩයේ සඳහන් වන්නේ.

ඇය අවසන් වරට දැක ඇති ස්ථානය ලෙස දැක්වෙන්නේ වික්ටෝරියාවේ Wallan Secondary College පාසලයි.

දැරියගේ ආරක්ෂාව පිළිබඳ පවුලේ සාමාජිකයින් දැඩි කනස්සල්ලෙන් පසුවන බවත්, ඇය සුරක්ෂිතව නැවත නිවසට ගෙන්වා ගැනීම සඳහා මහජන සහාය ඉල්ලා සිටින බවත් එම පණිවිඩයේ දැක්වෙනවා.

මේ අතර දැරිය සුරක්ෂිතව නැවත නිවසට ගෙන්වා දෙන ලෙස ඉල්ලා ඇයගේ පවුලේ සාමාජිකයින් සහ ප්‍රදේශවාසීන් අද විරෝධතාවක නිරත වූ බව වාර්තා වනවා.

මෙම විරෝධතාව පැවතියේ Wallan Secondary College පාසල ඉදිරිපිටදීයි.

දැරියගේ අතුරුදන්වීම සම්බන්ධයෙන් ස්වාධීන පරීක්ෂණයක් පවත්වන ලෙස විරෝධතාවට එක්වූ පිරිස ඉල්ලා සිට ඇති අතර, පාසල් සිසුන්ගේ ආරක්ෂාව සම්බන්ධයෙන් ද ඔවුන් දැඩි අවධානයක් යොමු කර තිබෙනවා.

විශේෂයෙන් බාලවයස්කරුවන් අපයෝජනය සඳහා ක්‍රමයෙන් පොළඹවා ගැනීම හෙවත් Grooming සහ මත්ද්‍රව්‍ය භාවිතය සම්බන්ධයෙන් පවතින පුළුල් සමාජ ගැටලු පිළිබඳව ද විරෝධතාකරුවන් සිය කනස්සල්ල පළ කර තිබෙනවා.

දැරිය සුරක්ෂිතව නැවත පවුලේ සාමාජිකයින් වෙත පැමිණෙනු ඇතැයි ප්‍රදේශවාසීන් බලාපොරොත්තු පළ කරන අතර, ඇය පිළිබඳ කිසියම් තොරතුරක් දන්නා අයෙකු සිටී නම් Wallan පොලිස් ස්ථානයේ (03) 5783 0400 දුරකථන අංකය ඇමතිය හැකියි.