ඔස්ට්‍රේලියාවේ සමාජ මාධ්‍ය භාවිතා කරන්නන්ට තමන්ට පෙන්වන අන්තර්ගතයන් තෝරාගැනීමේ වැඩි අයිතියක් ලබාදීම ඇතුළු නව ඩිජිටල් ආරක්ෂණ නීති මාලාවක් පාර්ලිමේන්තුවේ පහළ මන්ත්‍රී මණ්ඩලයේදී සම්මත වී තිබෙනවා.

මෙම යෝජනාව යටතේ, සමාජ මාධ්‍යවල තමන්ට පෙන්වන Feed එක තෝරාගැනීමේ වැඩි නිදහසක් පරිශීලකයන්ට හිමිවනු ඇති බව වාර්තා වෙනවා. ඒ අනුව, ඇල්ගොරිතම මඟින් නිර්දේශ කරන පළ කිරීම් ඇතුළත් Feed එකක් වෙනුවට තමන් Follow කරන පුද්ගලයන්ගේ සහ පිටුවල පළ කිරීම් පමණක් පෙන්වන Feed එකක් තෝරාගැනීමේ අවස්ථාව ද පරිශීලකයන්ට ලබාදීමට යෝජනා කර තිබෙනවා.

දැනටමත් ඇතැම් සමාජ මාධ්‍යවල මෙවැනි විකල්ප තිබුණත්, නව යෝජනාවේ අරමුණ වන්නේ පරිශීලකයන්ට තමන් කැමති ආකාරයට අන්තර්ගතයන් නැරඹීමට වඩාත් පහසු තේරීමක් ලබාදීමයි.

එමෙන්ම, වයස අවුරුදු 18ට අඩු දරුවන් අසභ්‍ය අන්තර්ගතයන්, කාන්තාවන්ට එරෙහි වෛරී ප්‍රකාශ, මානසික පීඩාව ඇති කරන පළ කිරීම් වැනි අන්තර්ගතයන්ගෙන් ආරක්ෂා කිරීම සඳහා සමාජ මාධ්‍ය සමාගම්වලට වැඩි වගකීමක් පැවරීමට ද යෝජනා කර තිබෙනවා.

AI මඟින් ක්‍රියාත්මක වන Chatbots සමඟ දරුවන් අනවශ්‍ය ලෙස මානසික බැඳීම් ඇති කරගැනීම වැළැක්වීමේ පියවර ද මෙම පනත් කෙටුම්පතට ඇතුළත් කර තිබෙනවා.

නීති උල්ලංඝනය කරන සමාගම්වලට ඕස්ට්‍රේලියානු ඩොලර් මිලියන 100කට වැඩි දඩ මුදල් පැනවීමේ හැකියාව ද යෝජනා කර ඇති අතර, පනත් කෙටුම්පත නොවැම්බර් 9 වැනිදා සෙනෙට් මණ්ඩලයේ විමර්ශනයට යොමු කිරීමට නියමිත බව සඳහන් වෙනවා.

කෙසේ වෙතත්, මෙම පනත් කෙටුම්පත තවමත් සම්පූර්ණයෙන් නීතියක් බවට පත්වී නොමැති අතර, ඉදිරි පාර්ලිමේන්තු ක්‍රියාවලියෙන් පසුව එහි අවසන් තීරණය ගැනීමට නියමිත බවයි වාර්තා වන්නේ.