ඔස්ට්‍රේලියාවේ නිවාස ඉදිකිරීමේ වියදම් ඉහළ යාමත් සමඟ, අඩු මිලට ඉදිකිරීම් ද්‍රව්‍ය ලබා ගැනීම සඳහා චීන නිෂ්පාදකයින් වෙත යොමු වීමට ඇතැම් ඉදිකිරීම්කරුවන් පියවර ගෙන තිබෙනවා.

චීනයෙන් සෘජුවම ද්‍රව්‍ය මිලදී ගැනීමෙන් ඔස්ට්‍රේලියාවේ මිලට සාපේක්ෂව 40%ත් 50%ත් අතර මුදලක් ඉතිරි කරගත හැකි බවයි NSW ප්‍රාන්තයේ Jaya Builds ආයතනයේ ඉදිකිරීම්කරු Josh Alcorn පවසන්නේ. ඔහු තවදුරටත් පවසා සිටින්නේ, තම පාරිභෝගිකයන් වෙනුවෙන් චීනයට ගොස් නිෂ්පාදන පරීක්ෂා කළ ඔහුට, අඩු මිලට උසස් තත්ත්වයේ ජනෙල් සහ දොරවල් සොයා ගැනීමට හැකි වූ බවයි.

2024, 2025 වසරවලදී ඔස්ට්‍රේරේලියාවට ආනයනය කළ පෙර සැකසූ ගොඩනැගිලි ද්‍රව්‍යවලින් 67.8%ක් චීනයෙන් .පැමිණ ඇති බවයි දත්ත වාර්තා පෙන්වා දෙන්නේ.

කෙසේ වෙතත්, ඔස්ට්‍රේලියාවේ Housing Industry Association (HIA) අනතුරු අඟවන්නේ අඩු මිලට ද්‍රව්‍ය මිලදී ගැනීමේදී නැව්ගත කිරීමේ ගාස්තු, රේගු බදු, රක්ෂණය සහ වගකීම් ඇතුළු අමතර වියදම් ද සැලකිල්ලට ගත යුතු බවයි. එමෙන්ම, ආනයනය කරන සියලුම ද්‍රව්‍ය ඔස්ට්‍රේලියානු ගොඩනැගිලි ප්‍රමිතීන් සහ ආරක්ෂක අවශ්‍යතා සපුරාලීම ද අනිවාර්ය වන බවයි HIA ආයතනය පවසන්නේ.

ඒ අනුව, ඔස්ට්‍රේලියාවේ නිවසක් ඉදිකිරීමට හෝ අලුත්වැඩියා කිරීමට බලාපොරොත්තු වන අයට චීනයෙන් ද්‍රව්‍ය මිලදී ගැනීම වියදම් අඩු කරගැනීමේ විකල්පයක් ලෙස සැලකිය හැකි නමුත්, මිලදී ගැනීම් සිදු කිරීමට පෙර අදාළ ප්‍රමිතීන් සහ අමතර වියදම් පිළිබඳව සොයා බැලීමේ වැදගත්කමද අවධාරණය කෙරෙනවා.