ජනප්‍රිය Sunscreen නිෂ්පාදන කිහිපයක් ලේබලවල සඳහන් පරිදි හිරු කිරණවලින් ආරක්ෂාව ලබා නොදෙන බව අනාවරණය වීමත් සමඟ, ඔස්ට්‍රේලියාවේ Sunscreen නිෂ්පාදන නියාමනය කිරීමේ නීති දැඩි කිරීමට Therapeutic Goods Administration (TGA) ආයතනය ප්‍රතිසංස්කරණ යෝජනාවක් ඉදිරිපත් කර තිබෙනවා.

2025 ජුනි මාසයේදී පාරිභෝගික සංවිධානයක් වන CHOICE සිදුකළ පරීක්ෂණයක ප්‍රතිඵල වලින්, Sunscreen නිෂ්පාදන 20කින් 16ක්ම ලේබලවල සඳහන් SPF අගයන්ට අනුකූල නොවන බව හෙළි වූ අතර, Ultra Violette සමාගමේ SPF 50+ ලෙස ප්‍රචාරය කළ එක් නිෂ්පාදනයක සැබෑ SPF අගය 4ක් පමණ වන බවයි වාර්තා වෙන්නේ.

යෝජිත නව ප්‍රතිසංස්කරණ යටතේ Sunscreen නිෂ්පාදන වෙළෙඳපොළට හඳුන්වා දීමේ දී ඒවායේ SPF පරීක්ෂණ දත්ත TGA වෙත ඉදිරිපත් කිරීම, නිෂ්පාදනවල කල් ඉකුත් වන දිනය දක්වා ඒවායේ ආරක්ෂණ හැකියාව තහවුරු කිරීම සඳහා වරින් වර පරීක්ෂණ පැවැත්වීම සහ අමුද්‍රව්‍යවල ගුණාත්මකභාවය සම්බන්ධ අවශ්‍යතා දැඩි කිරීම ඇතුළත් බවයි සදහන්.

එමෙන්ම, ප්‍රධාන වශයෙන් රූපලාවණ්‍ය කටයුතු සඳහා නිපදවන SPF සහිත නිෂ්පාදනවලට ප්‍රකාශ කළ හැකි ආරක්ෂණ මට්ටම් සීමා කරමින්, ඒවා සාමාන්‍ය Sunscreen නිෂ්පාදනවලින් පැහැදිලිව වෙන්කර හඳුනා ගැනීමට ද සැලසුම් යෝජනා වී තිබෙනවා.

Melanoma වැනි චර්ම පිළිකා අවදානම ඉහළ රටක් වන ඔස්ට්‍රේලියාවේදී, Sunscreen නිසි ලෙස භාවිත කිරීමේ වැදගත්කම පිළිබද ව විශේෂඥයන් අවධාරණය කර සිටිනවා. ඒ අනුව හිරු එළියට නිරාවරණය වන සමේ කොටස්වල ප්‍රමාණවත් ලෙස Sunscreen ආලේප කර, පැය දෙකකට වරක් සහ පිහිනීමෙන් හෝ දහඩිය දැමීමෙන් පසු නැවත ආලේප කිරීම නිර්දේශ කර තිබෙනවා. එමෙන්ම, SPF අගයන් අතර වෙනස්කම් සුළු වශයෙන් පැවතිය හැකි බැවින්, නිෂ්පාදන නිසි ලෙස භාවිත කිරීම පිළිබඳව ජනතාව දැනුවත් විය යුතු බවයි විශේෂඥයන් පෙන්වා දෙන්නේ.

CHOICE සංවිධානය මෙම ප්‍රතිසංස්කරණ පිළිගෙන ඇති අතර පරීක්ෂණ ප්‍රතිඵල මහජනතාවට ප්‍රසිද්ධ කිරීම සහ නිෂ්පාදනවල ආරක්ෂාව අඛණ්ඩව අධීක්ෂණය කිරීම සම්බන්ධයෙන් තවදුරටත් පියවර ගත යුතු බව පෙන්වා දී තිබෙනවා. මෙම වෙනස්කම් අදියර වශයෙන් ක්‍රියාත්මක කිරීමට සැලසුම් කරන බවයි TGA ආයතනය වැඩිදුරටත් පවසන්නේ.