ඔස්ට්‍රේලියාව මුහුණ දෙන ආර්ථික අභියෝග එක රැයකින් විසඳිය නොහැකි බව අග්‍රාමාත්‍ය ඇන්තනි ඇල්බනීසි පවසනවා.

දේශීය හා ජාත්‍යන්තර වශයෙන් පවතින ආර්ථික පීඩනවල බලපෑමෙන් ඔස්ට්‍රේලියාවට ද මිදිය නොහැකි බව පෙන්වා දෙන ඔහු, ඉහළ යන ජීවන වියදම සම්බන්ධයෙන් ෆෙඩරල් රජයට එල්ල වන පීඩනය මධ්‍යයේ මෙම අදහස් පළ කර තිබෙනවා.

නවතම දත්ත අනුව, සැප්තැම්බර් මාසයෙන් අවසන් වූ වසරක කාලය තුළ ඔස්ට්‍රේලියාවේ වාර්ෂික උද්ධමන අනුපාතය සියයට 4.3ක් දක්වා ඉහළ ගොස් තිබෙනවා.

එය ඊට පෙර මාසයේ පැවති සියයට 4ක අගයට වඩා වැඩි අගයක් වන අතර, මේ වසරේ පස්වැනි වරටත් පොලී අනුපාත ඉහළ නැංවීමක් සිදුවිය හැකි බවට අපේක්ෂා වැඩි වී තිබෙනවා.

මැදපෙරදිග ගැටුම් සහ ඉන්ධන මිල ඉහළ යාම ඇතුළු දේශීය හා ජාත්‍යන්තර බලපෑම් උද්ධමනයට හේතු වන බව රජය පෙන්වා දෙනවා. සැප්තැම්බර් මාසයේදී පෙට්‍රල් මිල සියයට 9.4කින් ඉහළ ගොස් ඇති අතර, පසුගිය වසර තුළ එහි ඉහළ යාම සියයට 24කට ආසන්න වී තිබෙනවා.

මේ අතර, ක්‍රෙඩිට් කාඩ් මගින් ගෙවීම් කිරීම සම්බන්ධයෙන් පනවන්නට යෝජනා කළ ආන්දෝලනාත්මක තහනම පිළිබඳව කුඩා ව්‍යාපාර සමඟ වඩාත් විවෘතව සාකච්ඡා කළ යුතුව තිබූ බව ඔස්ට්‍රේලියානු බදු කාර්යාලයේ කොමසාරිස් රොබ් හෙෆරන් පිළිගෙන තිබෙනවා.

අදාළ තීරණය ප්‍රසිද්ධ කිරීමට ටික වේලාවකට පෙර ව්‍යාපාරිකයන්ට ඒ පිළිබඳ දැනුම් දීම විවේචනයට ලක්ව තිබෙනවා.

දෙසැම්බර් මාසයේදී ඉදිරිපත් කිරීමට නියමිත වසර මැද අයවැය යාවත්කාලීනයේදී රජයේ වියදම්වලින් ඉතිරි කිරීම් හඳුනා ගැනීමට ද සැලසුම් කර තිබෙනවා.

කෙසේ වෙතත්, රෝහල්, පාසල් සහ අත්‍යවශ්‍ය මහජන සේවා සඳහා වන අරමුදල් කප්පාදු කිරීමට ඉලක්ක නොකරන බව අග්‍රාමාත්‍යවරයා ප්‍රකාශ කර තිබෙනවා.

එමෙන්ම, දේශීය ගෑස් සැපයුම ශක්තිමත් කරමින් නිෂ්පාදන කර්මාන්තවලට සහාය වීම සහ ගෑස් මිල පහත හෙළීමේ අරමුණින්, ගෑස් අපනයනයෙන් සියයට 20ක් දක්වා ප්‍රමාණයක් දේශීය භාවිතය සඳහා වෙන් කිරීමට අදාළ යෝජිත නීති පාර්ලිමේන්තුවේ නියෝජිත මන්ත්‍රී මණ්ඩලයේදී විවාදයට ගැනීමට නියමිතයි.