මැදපෙරදිග යුද ගැටුම් හේතුවෙන් ලෝක ඉන්ධන මිල ඉහළ යාමත් සමඟ ඔස්ට්‍රේලියානුවන්ට සාමාන්‍යයෙන් එක් අයෙකුට ඩොලර් 500කට වැඩි අමතර ඉන්ධන වියදමක් දැරීමට සිදුව ඇති බව නව විශ්ලේෂණයකින් හෙළි ව තිබෙනවා.

Centre for Research on Energy and Clean Air (CREA) ආයතනයේ විශ්ලේෂණයකට අනුව, ඉන්ධන මිල ඉහළ යාමෙන් බලපෑමට ලක්වූ රටවල් අතර ඔස්ට්‍රේලියාව තුන්වන ස්ථානයේ පසුවනවා. මෙම විශ්ලේෂණය සඳහා ජනවාරි සහ පෙබරවාරි මාසවල ඉන්ධන මිල, මාර්තු සිට ඔක්තෝබර් දක්වා පැවති මිල ගණන් සමඟ සංසන්දනය කර ඇති බවයි සදහන්.

ඔස්ට්‍රේලියාව සිය පිරිපහදු කළ සහ බොරතෙල් අවශ්‍යතාවයෙන් 90%කට වැඩි ප්‍රමාණයක් ආනයනය කරන බැවින්, ජාත්‍යන්තර ඉන්ධන මිල ඉහළ යාම රටට දැඩි බලපෑම් ඇති කළ හැකි බවයි විශේෂඥයන් පෙන්වා දෙන්නේ.

එමෙන්ම, රට තුළ ඩීසල් භාවිතය ඉහළ යාම ද මෙම තත්ත්වයට බලපා තිබෙනවා. 2000 වසරේ සිට මෑත කාලය දක්වා ඔස්ට්‍රේලියාවේ ඩීසල් භාවිතය 33%කින් ඉහළ ගොස් ඇති බවයි බලශක්ති විශේෂඥයන් සඳහන් කරන්නේ. පතල් කර්මාන්තය, කෘෂිකර්මාන්තය සහ මාර්ග ප්‍රවාහනය සඳහා ඩීසල් වැඩි වශයෙන් භාවිත කිරීම මෙම තත්ත්වයට බලපා ඇති බවයි ඔවුන් තවදුරටත් පෙන්වා දෙන්නේ. ඉන්ධන මිල ඉහළ යාම මගින් භාණ්ඩ ප්‍රවාහන වියදම් ද ඉහළ යන අතර, එය අවසානයේ භාණ්ඩ හා සේවා මිල ගණන් ඉහළ යාමට ද හේතු විය හැකියි.

මේ අතර, විදුලි වාහන භාවිතය ඉහළ නැංවීම ඔස්ට්‍රේලියාවේ ඉන්ධන මිල ඉහළ යාමේ බලපෑම අඩු කිරීමට උපකාරී වනු ඇති බවයි විශේෂඥයන් පවසන්නේ. විදුලි සහ Hybrid වාහන භාවිතය හරහා ඉන්ධන වියදම් අඩු කරගැනීමට හැකි වී ඇති බව ඔවුන් තවදුරටත් පෙන්වා දී තිබෙනවා.