ඔස්ට්‍රේලියාවේ නිසි බලපත්‍ර නොමැතිව වාහන අලෙවි කරන වෙළෙඳුන් සහ නීතිවිරෝධී ලෙස වාහන අලුත්වැඩියා කරන පුද්ගලයන්ට එරෙහිව බලධාරීන් දැඩි පියවර ගෙන තිබෙනවා.

නිව් සවුත් වේල්ස් (NSW) ප්‍රාන්තයේ NSW Fair Trading ආයතනය 2026 ජූලි මාසයේ සිට සිදුකළ හදිසි පරීක්ෂණ 200කට ආසන්න සංඛ්‍යාවකින් පසුව, නීති ක්‍රියාමාර්ග 65ක් ගෙන ඇති බව වාර්තා වනවා.

ඒ අතරට ඩොලර් 130,000කට වැඩි වටිනාකමකින් යුත් දඩ 40ක් සහ නිල අනතුරු ඇඟවීම් 15ක් ඇතුළත් වන අතර, දඩ 17ක්ම බලපත්‍ර නොමැතිව මෝටර් රථ අලෙවි කිරීම සම්බන්ධයෙන් පනවා තිබෙනවා.

නිසි බලපත්‍රයක් නොමැතිව වාහන අලෙවි කිරීම, වාහනයේ සැතපුම් හෝ කිලෝමීටර් ගණන වෙනස් කිරීම, දෝෂ සහිත වාහන විකිණීම, පරීක්ෂණ සහතික ව්‍යාජ ලෙස සකස් කිරීම සහ අවශ්‍ය බලපත්‍ර අලුත් නොකිරීම වැනි කරුණු පිළිබඳව බලධාරීන් විශේෂ අවධානයක් යොමු කර තිබෙනවා.

මෙවැනි වංචාවන්ට සම්බන්ධ වූ වෙළෙඳුන්ට එරෙහිව මීට පෙරත් නීතිමය ක්‍රියාමාර්ග ගෙන ඇති අතර, ඇතැම් සිද්ධීන්වලදී පාරිභෝගිකයන්ට වන්දි ගෙවීමට අධිකරණ නියෝග ද ලබාදී තිබෙනවා.

මේ අතර, පාවිච්චි කළ මෝටර් රථයක් මිලදී ගැනීමට පෙර වෙළෙඳුන්ගේ බලපත්‍ර තත්ත්වය NSW Fair Trading නිල ලේඛනයෙන් පරීක්ෂා කරන ලෙසත්, වාහනයේ ඉතිහාසය Service NSW හරහා තහවුරු කරගන්නා ලෙසත් බලධාරීන් ජනතාවට උපදෙස් දෙනවා.

විශේෂයෙන්ම පාවිච්චි කළ වාහනයක් මිලදී ගැනීමේදී සැඟවුණු දෝෂ, ව්‍යාජ ලේඛන සහ වංචාවන් පිළිබඳව සැලකිලිමත් වීමෙන් අනපේක්ෂිත මූල්‍ය පාඩු වළක්වාගත හැකියි.