වික්ටෝරියා ප්‍රාන්ත මැතිවරණය ළංවීමත් සමඟ සංක්‍රමණිකයන් සහ විවිධ ජනවාර්ගික ප්‍රජාවන් ඉලක්ක කරගත් දේශපාලන ප්‍රචාරණ සම්බන්ධයෙන් දැඩි කතාබහක් ඇති වී තිබෙනවා.

නොවැම්බර් 28 වැනිදා පැවැත්වීමට නියමිත ප්‍රාන්ත මැතිවරණය හමුවේ ජාතිවාදී අදහස් සහ ප්‍රකාශ ඉහළ යමින් පවතින බවට බහුසංස්කෘතික ප්‍රජා නියෝජිතයන් කනස්සල්ල පළ කර තිබෙනවා.

Ethnic Communities Council of Victoria ආයතනය පවසන්නේ තම සාමාජිකයන්ගේ වාර්ෂික ගැටලු ලැයිස්තුවේ පළමු වරට ජාතිවාදය ප්‍රධාන ගැටලුව බවට පත්ව ඇති බවයි.

එකම සංස්කෘතියක් ප්‍රමුඛ කරගත් සමාජයක් ප්‍රවර්ධනය කරන දේශපාලන ප්‍රකාශ හේතුවෙන් ඇතැම් සංක්‍රමණික ප්‍රජාවන් අතර බියක් සහ තමන් සමාජයෙන් බැහැර කරනු ලබන බවට හැඟීමක් ඇති වී තිබෙන බවයි එහි ප්‍රධාන විධායක නිලධාරිනී Farah Farouque පෙන්වා දෙන්නේ.

විශේෂයෙන් One Nation පක්ෂය විසින් අපරාධ සහ සංක්‍රමණ සම්බන්ධයෙන් නිකුත් කළ මැතිවරණ ප්‍රචාරක වීඩියෝ කිහිපයක් මේ වනවිට විවේචනයට ලක්ව තිබෙනවා.

එම වීඩියෝවල ඇතැම් ජනවාර්ගික පෙනුමක් සහිත පුද්ගලයන් අපරාධ ක්‍රියාවන් සමඟ සම්බන්ධ කර පෙන්වීමෙන් සමාජයේ අගතිගාමී අදහස් වර්ධනය විය හැකි බවයි විවේචකයන් පවසන්නේ.

කෙසේ වෙතත් One Nation පක්ෂය මෙම චෝදනා ප්‍රතික්ෂේප කරමින් සඳහන් කරන්නේ තම ප්‍රචාරණ වැඩසටහන් ජාතිවාදී නොවන බවයි.

එම පක්ෂයේ Victoria ප්‍රාන්ත නායක Warren Pickering පවසන්නේ ජනවාර්ගික පසුබිම නොසලකා සියලුම ඡන්දදායකයන් සමඟ සම්බන්ධ වීමට තම පක්ෂය බලාපොරොත්තු වන බවයි.

One Nation පාලනයක් සම්බන්ධයෙන් කිසිවෙකු බිය විය යුතු නැති බව ද ඔහු ප්‍රකාශ කර තිබෙනවා.

2021 ජන සංගණන දත්ත අනුව වික්ටෝරියා ප්‍රාන්තයේ ජනගහනයෙන් සියයට 30ක් පමණ විදේශයන්හි උපත ලැබූ පුද්ගලයන් වන අතර, එම ජනතාව ප්‍රාන්තයේ සමාජීය හා ආර්ථික ක්‍රියාකාරකම්වල වැදගත් කොටසක් නියෝජනය කරනවා.

මේ අතර මැතිවරණ ප්‍රචාරණයේදී සංක්‍රමණික ප්‍රතිපත්ති පිළිබඳ සාකච්ඡා සිදුකිරීම වැදගත් වුවද, සියලුම ජනවාර්ගික ප්‍රජාවන්ට ගෞරවයක් සහ ආරක්ෂිත බවක් දැනෙන පරිසරයක් පවත්වාගෙන යාම අත්‍යවශ්‍ය බවයි ප්‍රජා නියෝජිතයන් අවධාරණය කරන්නේ.