ඔස්ට්‍රේලියානු වීසා අයදුම්කරුවන්ගේ අනන්‍යතාව තහවුරු කිරීම සඳහා ක්‍රියාත්මක කරන Biometrics Collection Program එක රටවල් 60කට ආසන්න සංඛ්‍යාවකට ව්‍යාප්ත කර ඇති බව ඔස්ට්‍රේලියානු ස්වදේශ කටයුතු දෙපාර්තමේන්තුව (Department of Home Affairs) නිවේදනය කර තිබෙනවා.

මෙම වැඩසටහන යටතේ වීසා අයදුම්කරුවන්ගේ Fingerprints සහ facial photographs වැනි Biometric information ලබාගනිමින් ඔවුන්ගේ අනන්‍යතාව තහවුරු කිරීමට කටයුතු කරනවා.

මෑතකදී ඉන්දියාව, මොංගෝලියාව සහ ලාඕසය යන රටවල වීසා අයදුම්කරුවන් සඳහාද Biometrics අවශ්‍යතා ක්‍රියාත්මක කිරීමත් සමඟ මෙම වැඩසටහන තවදුරටත් පුළුල් වී තිබෙනවා.

වීසා අයදුම්පත් සම්බන්ධ වංචා වැළැක්වීම, පුද්ගල අනන්‍යතාව නිවැරදිව තහවුරු කිරීම සහ ඔස්ට්‍රේලියාවේ සංක්‍රමණ පද්ධතියේ ආරක්ෂාව ශක්තිමත් කිරීම මෙහි ප්‍රධාන අරමුණු අතර වනවා.

මේ අතර සුදුසුකම් ලබන වීසා අයදුම්කරුවන්ට Australian Immi App එක හරහා සිය Biometrics අවශ්‍යතා සම්පූර්ණ කිරීමට ද අවස්ථාව ලබාදී තිබෙනවා.

මෙම App එක භාවිත කරමින් ගමන් බලපත්‍රයේ තොරතුරු සහ facial photograph එක ආරක්ෂිතව ඉදිරිපත් කළ හැකි අතර, සුදුසුකම් ලබන පුද්ගලයන්ට Biometrics Collection Centre වෙත පැමිණීමේ අවශ්‍යතාව ද ඉවත් වනවා.

Australian Immi App එක භාවිතය සඳහා අමතර ගාස්තුවක් අය නොකිරීම ද විශේෂත්වයක්.

කෙසේ වෙතත්, සියලුම වීසා අයදුම්කරුවන්ට මෙම පහසුකම හිමි නොවන අතර, Biometrics ලබාදිය යුතු පුද්ගලයන්ට සහ අදාළ ක්‍රමවේදයට සම්බන්ධ උපදෙස් Department of Home Affairs විසින් සෘජුව දැනුම් දෙනවා.

ශ්‍රී ලංකාවේ සිට ඔස්ට්‍රේලියානු වීසා සඳහා අයදුම් කරන සුදුසුකම් ලත් පුද්ගලයන්ට ද Australian Immi App භාවිත කිරීමේ පහසුකම පවතිනවා.

කෙසේ වෙතත්, මෙම App එක භාවිත කිරීමට Biometrics ඉදිරිපත් කරන ලෙස ලැබුණු ලිපියේ Visa Lodgement Number (VLN) අංකය AUI යන අකුරුවලින් ආරම්භ විය යුතුයි.

එසේ නොවන අයදුම්කරුවන්ට අදාළ Biometrics Collection Centre වෙත පැමිණීමට සිදුවනවා.

මේ පිළිබඳ වැඩි විස්තර සඳහා ඔස්ට්‍රේලියානු රජයේ නිල වෙබ් අඩවියට පිවිසිය හැකියි.