ඔස්ට්‍රේලියාවේ ප්‍රථම වරට රොබෝ යන්ත්‍ර මඟින් ආහාර නිවෙස් වෙත බෙදාහැරීමේ සේවාවක් Queensland ප්‍රාන්තයේ Gold Coast නගරයේදී අත්හදා බැලීම ආරම්භ කර තිබෙනවා.

DoorDash සහ Serve Robotics සමාගම් එක්ව ක්‍රියාත්මක කරන මෙම නව සේවාව යටතේ, කිලෝග්‍රෑම් 100ක් පමණ බරැති රෝද හතරකින් සමන්විත ස්වයංක්‍රීය රොබෝ යන්ත්‍ර ආහාර බෙදාහැරීම සඳහා යොදා ගැනෙනවා.

මෙම රොබෝ යන්ත්‍රවල ආහාර උණුසුම්ව හෝ සිසිල්ව තබාගත හැකි විශේෂිත ගබඩා පහසුකම් ඇති අතර, ඒවා මිනිසෙකු ඇවිදින වේගයට සමාන වේගයකින් ගමන් කරනවා.

අදාළ සමාගම පවසන ආකාරයට මෙම රොබෝ යන්ත්‍රවල බෙදාහැරීම් සාර්ථකත්ව අනුපාතය සියයට 99.8ක්.

කෙසේ වෙතත්, 7NEWS නාලිකාව ඔස්සේ සජීවීව මෙම තාක්ෂණය හඳුන්වා දෙන අවස්ථාවේදී එක් රොබෝ යන්ත්‍රයක් මල් පාත්තියක සිරවීම හේතුවෙන් තාක්ෂණික ගැටලුවකට මුහුණ දී තිබෙනවා.

එම අවස්ථාවේදී වාර්තාකරු සඳහන් කළේ මෙවැනි ගැටලු විසඳීම සඳහා තාක්ෂණික සහායක කණ්ඩායම් සූදානමින් සිටින බවයි.

මෙම අත්හදා බැලීමේ මූලික අරමුණ කෙටි දුර ආහාර බෙදාහැරීම් සඳහා රොබෝ තාක්ෂණය භාවිත කිරීම වන අතර, මිනිස් බෙදාහැරීම් සේවකයන් සම්පූර්ණයෙන් ප්‍රතිස්ථාපනය කිරීම මෙහි අරමුණ නොවන බව සංවිධායකයන් පවසනවා.

මේ අතර DoorDash හරහා ආහාර ඇණවුම් කරන පාරිභෝගිකයන්ට රොබෝ යන්ත්‍රයක් මඟින් ආහාර ගෙන්වා ගැනීමේ විකල්පය තෝරාගැනීමට ද අවස්ථාව හිමිවනවා.

සෑම සේවා මුරයක් අවසානයේම මෙම රොබෝ යන්ත්‍ර Griffith Universityහි පිහිටි මෙහෙයුම් මධ්‍යස්ථානය වෙත නැවත පැමිණීමට නියමිතයි.

අත්හදා බැලීම සාර්ථක වුවහොත් ඉදිරි සති සහ මාස කිහිපය තුළ Gold Coast නගරයේ තවත් ප්‍රදේශවලට මෙම සේවාව ව්‍යාප්ත කිරීමට සැලසුම් කර තිබෙනවා.