ඔස්ට්‍රේලියානු අගමැති Anthony Albanese, යුරෝපා සංගමය සමඟ ඇති කරගත් Free Trade Agreement හෙවත් නිදහස් වෙළද ගිවිසුමට විරෝධය පළ කරන දේශපාලන පාර්ශ්වවලට දැඩි විවේචනයක් එල්ල කර තිබෙනවා.

මෙම ගිවිසුමට සහය නොදැක්වීම ඔස්ට්‍රේලියාවේ ආර්ථික අනාගතයට හානි කරන Nativist Politics හෙවත් විදේශීය වෙළෙඳාමට සීමා පනවන දේශපාලන ප්‍රවණතාවක් බවයි අගමැතිවරයා පවසන්නේ.

වසර අටක සාකච්ඡාවලින් පසු 2026 මාර්තු මාසයේදී අවසන් කළ මෙම ගිවිසුම තවමත් ඔස්ට්‍රේලියානු පාර්ලිමේන්තුවේ අනුමැතිය ලබාගෙන නොමැති බවටයි සදහන්.

මෙම ගිවිසුම ක්‍රියාත්මක වුවහොත් යුරෝපයෙන් ආනයනය කරන ආහාර, වයින්, මෝටර් රථ සහ ඇඳුම් මිල අඩුවීමටත් ඔස්ට්‍රේලියානු අපනයන සඳහා නව වෙළෙඳපොළ අවස්ථා ඇතිවීමටත් ඉඩ සැලසෙනු ඇති බවටයි වාර්තා වන්නේ .

එමගින් ඔස්ට්‍රේලියානු භාණ්ඩ හා සේවා අපනයනවලින් 98% ක් තීරුබදු රහිතව සිදුකිරීමට හැකි වන අතර රටේ ආර්ථිකයට ඩොලර් බිලියන 10ක වර්ධනයක් ලැබෙනු ඇති බවයි අගමැති Albanese පෙන්වා දෙන්නේ.

කෙසේ වෙතත්, ගිවිසුම මගින් ගොවීන්ට සහ වානේ කර්මාන්තයට සිදුවිය හැකි බලපෑම් පිළිබඳව Nationals පක්ෂය සහ ගොවි සංවිධාන විරෝධය පළ කර තිබෙන බවට සදහන්.

විපක්ෂ නායක Angus Taylor ද මෙම ගිවිසුම නැවත සාකච්ඡා කළ යුතු බව පවසන අතර, Greens පක්ෂයද තවමත් අවසන් සහයෝගය ලබාදීමට එකඟ වී නොමැති බැවින් ගිවිසුමේ අනාගතය පිළිබඳ දේශපාලන විවාදය තවදුරටත් උණුසුම් වී තිබෙනවා.