ඔස්ට්‍රේලියානු ආරක්ෂක හමුදාවේ (Australian Defence Force – ADF) සාමාජිකයන්ගෙන් සියයට 25කට ආසන්න පිරිසක් වෛද්‍යමය හේතු මත යුද මෙහෙයුම් සඳහා යෙදවීමට නුසුදුසු තත්ත්වයක සිටින බව අනාවරණය වී තිබෙනවා.

ඊයේ පැවති ඔස්ට්‍රේලියානු සෙනෙට් සභාවේ අයවැය ඇස්තමේන්තු විමර්ශන කමිටු රැස්වීමකදී ආරක්ෂක අංශයේ ඉහළ නිලධාරීන් මේ බව තහවුරු කළා.

ස්වාධීන සෙනෙට් සභික David Pocock විසින් ඉදිරිපත් කළ ප්‍රශ්නවලට පිළිතුරු දෙමින් ආරක්ෂක හමුදාවේ පුද්ගල කළමනාකරණ ප්‍රධානී Lieutenant General Natasha Fox සඳහන් කළේ, හමුදා සාමාජිකයන්ගෙන් සියයට 75කට වැඩි පිරිසක් පමණක් මෙහෙයුම් සඳහා යෙදවිය හැකි වෛද්‍ය වර්ගීකරණයක සිටින බවයි.

කෙසේ වෙතත්, මෙහෙයුම් සඳහා යෙදවිය නොහැකි සියලුම සාමාජිකයන් ස්ථිරවම අසනීප තත්ත්වයක පසුවන බව ඉන් අදහස් නොවන අතර, තාවකාලික ආබාධ සහ පුනරුත්ථාපන ප්‍රතිකාර ලබන පිරිස් ද ඊට ඇතුළත් වනවා.

මේ අතර ඔස්ට්‍රේලියාවේ හමුදා කඳවුරුවල ආරක්ෂාව සම්බන්ධයෙන් ද නව ගැටලු මතුව තිබෙනවා.

Newcastle නගරයට උතුරින් පිහිටි Williamtown ගුවන් හමුදා කඳවුර ආශ්‍රිතව හඳුනා නොගත් ඩ්‍රෝන යානා අවස්ථා කිහිපයකදී නිරීක්ෂණය වී ඇති බවයි ආරක්ෂක බලධාරීන් අනාවරණය කර ඇත්තේ.

මෙම කඳවුර ඔස්ට්‍රේලියාවේ ප්‍රධාන F-35 ප්‍රහාරක ගුවන් යානා මධ්‍යස්ථානයක් වන අතර, එහි ආරක්ෂාව සම්බන්ධයෙන් විශේෂ අවධානයක් යොමු වී තිබෙනවා.

ඒ අනුව ඔස්ට්‍රේලියාව පුරා පිහිටි හමුදා කඳවුරු 170කට ආසන්න සංඛ්‍යාවක ආරක්ෂාව ශක්තිමත් කිරීම සඳහා Albanese රජය නව නීති කෙටුම්පතක් ඔක්තෝබර් 27 වැනිදා පාර්ලිමේන්තුවට ඉදිරිපත් කර තිබෙනවා.

එම නීති ක්‍රියාත්මක වුවහොත් හමුදා කඳවුරුවලට තර්ජනයක් වන ඩ්‍රෝන යානා හඳුනාගැනීමට, නිරීක්ෂණය කිරීමට සහ අවශ්‍ය අවස්ථාවලදී ඒවා අක්‍රිය කිරීමට හෝ විනාශ කිරීමට ආරක්ෂක අංශවලට නීතිමය බලතල හිමිවනු ඇති.

කෙසේ වෙතත්, මෙම නීති කෙටුම්පත තවමත් පාර්ලිමේන්තු සලකා බැලීමේ ක්‍රියාවලියේ පවතිනවා.