මෙල්බර්න්හි පැවති විදේශ අමාත්ය විජිත හේරත්ගේ ජනහමුව සම්බන්ධයෙන් මේ වනවිට සමාජ මාධ්ය ඔස්සේ දැඩි කතාබහක් මතුව තිබෙනවා.
ඕස්ට්රේලියාවේ මෙල්බර්න් නුවර වෙසෙන ශ්රී ලාංකික ප්රජාව විසින් සංවිධානය කරන ලද මෙම විශේෂ සාකච්ඡාව ඊයේ Springvale නගර ශාලාවේදී පැවැත්වුණු අතර, ශ්රී ලාංකිකයින් 250 කට වැඩි පිරිසක් සහභාගී වූ බවයි දැනගන්නට ලැබුණේ.
AusLanka TV මාධ්ය ජාලයටද මෙම අවස්ථාව ආවරණය කිරීම සඳහා ආරාධනා කර තිබුණා.
මෙහිදී ඕස්ට්රේලියාවේ වෙසෙන ශ්රී ලාංකිකයින් මුහුණ දෙන ගැටලු, වත්මන් රජය විසින් ගෙන ඇති ප්රතිපත්තිමය තීරණ සහ ඉදිරි වැඩපිළිවෙළ සම්බන්ධයෙන් මෙන්ම පසුගිය රජයේ අමාත්යවරුන් සහ රජයන් කළ සොරකම් හා සිරදඩුවම් විදින ඇමතිවරුන් සම්බන්ධයෙන් වැඩසටහන අතරතුර අමාත්යවරයා ආඩම්බරයෙන් කරුණු ඉදිරිපත් කර තිබෙනවා.
පාස්කු මහ මොල කරු අත්අඩංගුවට ගෙන ඇති බවත් මහින්දානන්ද ඇමතිවරයා බන්ධනාගාරගත කිරීම පිලිබදවත්, පිල්ලෙයාන්, SM රංජිත් වැනි අයට එරෙහිව ගෙන ඇති අධිකරණ ක්රියාමාර්ග ගැනත් එතුමා වැඩිදුරටත් අදහස් දැක්වුවා.
කෙසේවෙතත් හිටපු රජයන් කළ සොරකම් සම්බන්ධයෙන් පුනපුනා කතාකිරීම විදේශ රටක සිටින ශ්රී ලාංකිකයින්ට එතරම් වැදගත් නොවන බවත් ලංකාවේ දියුණුව සහ ඔවුන්ට ඇති ප්රශ්න පිළිබඳ සාකච්ඡා කිරීමටයි ඔවුන් එතැනට පැමිණි බවයි ඊට සහභාගි වූවන් සඳහන්කරන්නේ.
කෙසේවෙතත්, මෙම හමුව සම්බන්ධයෙන් පසුව විවිධ ඡායාරූප සමාජ මාධ්ය තුළ සංසරණය වූ අතර, ඇතැම් ඡායාරූපවල හිස් පුටු දක්නට ලැබීම හේතුවෙන් සහභාගීත්වය පිළිබඳ විවාදයක් ද මතුව තිබෙනවා.
හමුවේ ප්රශ්නෝත්තර වටයේදී විදේශගත ශ්රී ලාංකිකයින් රටේ සංවර්ධන සැලසුම්, විදේශයන්හි වෙසෙන ශ්රී ලාංකික වෘත්තිකයින්ගේ දායකත්වය ලබාගැනීම සඳහා රජය සතුව ඇති වැඩපිළිවෙළ, ද්විත්ව පුරවැසිභාවය සඳහා අය කෙරෙන ගාස්තු ඇතුළු කරුණු රැසක් පිළිබඳ ප්රශ්න ඉදිරිපත් කර තිබුණා.
කෙසේ වෙතත්, අමාත්යවරයාගේ පැමිණීම ප්රමාද වීම, කතාව සඳහා වැඩි කාලයක් ගත වීම සහ ප්රශ්නෝත්තර සැසිය සඳහා ප්රමාණවත් කාලයක් නොලැබීම හේතුවෙන් ඇතැම් සහභාගීවන්නන් හමුව අවසන් වීමට පෙර පිටව ගිය බවද වාර්තා වනවා.
එමෙන්ම අමාත්යවරයාගෙන් ඇසූ ප්රශ්න කිහිපයක් පහත දැක්වෙන අතර ඉන් ප්රශ්න කිහිපයක් මගහැරිය බවයි සහභාගිවූවන් පිළිතුරු ලබාදී නොමැති බවද සඳහන්.
මේ අතර, අමාත්ය විජිත හේරත් සිය සමාජ මාධ්ය ගිණුම් ඔස්සේ සඳහන් කර ඇත්තේ ශාලාවේ ඉඩ පහසුකම් සීමිත වීම හේතුවෙන් පැමිණි සියලු දෙනාට ඇතුළුවීමට අවස්ථාව ලබාදිය නොහැකි වූ බවයි.
ඔහුගේ ඕස්ට්රේලියානු සංචාරය අතරතුර තවත් නිල හමුවීම් කිහිපයකට සහභාගී වීමට නියමිත අතර, ඉදිරියේදී ඕස්ට්රේලියාවේ අනෙකුත් නගරවල වෙසෙන ශ්රී ලාංකික ප්රජාවද හමුවීමට අපේක්ෂා කරන බව වාර්තා වනවා.
