පැසිෆික් කලාපය හරහා ඔස්ට්රේලියාවට සිදුවන මත්ද්රව්ය ජාවාරම පාලනය කිරීම සඳහා ඔස්ට්රේලියානු ෆෙඩරල් පොලිසිය (AFP) සහ නවසීලන්ත පොලිසිය එක්ව කොලොම්බියාවේදී විශේෂ අන්තර්ජාතික ඒකාබද්ධ පරීක්ෂණ කණ්ඩායමක් (IJIT) ස්ථාපිත කිරීමට පියවර ගෙන තිබෙනවා.
AFP කොමසාරිස් ක්රිසි බැරට් ප්රකාශ කළේ, කොලොම්බියානු බලධාරීන්, ඇමරිකානු නීති ක්රියාත්මක කිරීමේ ආයතන, ඉන්ටර්පෝල් සහ මෙක්සිකෝව ඇතුළු පැසිෆික් කලාපීය නියෝජිතයන් සමඟ එක්ව මෙම මෙහෙයුම් ක්රියාත්මක වන බවයි.
කෙසේ වෙතත්, මෙම ජාත්යන්තර මෙහෙයුමේ අයවැය, ක්රියාකාරී ඉලක්ක සහ සාර්ථකත්වය මැන බලන නිර්නායකයන් ඇතුළත් ලිපිගොනු 60ක් නිකුත් කිරීම ඔස්ට්රේලියානු ෆෙඩරල් පොලිසිය ප්රතික්ෂේප කර තිබෙනවා.
ජාතික ආරක්ෂාව සහ ජාත්යන්තර සබඳතාවලට සිදුවිය හැකි හානිය ඊට හේතුව ලෙසයි ඔවුන් දක්වා ඇත්තේ.
මේ අතර, ඔස්ට්රේලියාව ලබාදෙන බුද්ධි තොරතුරු, පැසිෆික් හා කැරබියන් කලාපයේ සැකකටයුතු මත්ද්රව්ය ප්රවාහන යාත්රාවලට ඇමරිකාව මගින් එල්ල කරනු ලබන මාරාන්තික ගුවන් ප්රහාර සඳහා භාවිත විය හැකි බවට ග්රීන්ස් පක්ෂයේ සෙනෙට් සභික David Shoebridge සහ හිටපු AFP ජ්යෙෂ්ඨ නිලධාරීන් කනස්සල්ල පළ කරනවා.
මෙවැනි ප්රහාර නීති විශාරදයන් විසින් හඳුන්වනු ලබන්නේ අධිකරණමය ක්රියාමාර්ගවලින් බාහිරව සිදුකරන ඝාතනයන් ලෙසයි.
කෙසේ වෙතත්, ඔස්ට්රේලියාවේ වාර්ෂික මත්ද්රව්ය භාවිතය ටොන් 26.8ක් දක්වා ඉහළ ගොස් ඇති පසුබිමක, මහජන මුදල් වැයවන මෙවැනි ව්යාපෘතිවල විනිවිදභාවය අත්යවශ්ය බව විපක්ෂයේ Shadow ස්වදේශ කටයුතු අමාත්ය Jonno Duniam ද අවධාරණය කර සිටිනවා.
