ඔස්ට්රේලියාවට පැමිණීමට බලා සිටින විදේශීය හෙදියන්, ගුරුවරුන් සහ වෙනත් දක්ෂ සේවකයන්ට වීසා තීරණයක් ලබාගැනීමට මාස 12ක් දක්වා බලා සිටීමට සිදුවිය හැකි බව වාර්තා වනවා.
ස්වදේශ කටයුතු අමාත්ය ටෝනි බර්ක් විසින් ජූලි මාසයේ නිකුත් කළ නව වීසා ප්රමුඛතා නියෝගයේ දැක්වෙන්නේ, දැනට රට තුළ සිටින දක්ෂ සේවක සහ සේවායෝජක අනුග්රහය ලැබූ වීසා අයදුම්කරුවන්ට, විදේශයෙන් අයදුම් කරන අයට වඩා ප්රමුඛතාව ලබාදී ඇති බවයි.
ආරක්ෂක සහ නීතිය ක්රියාත්මක කිරීමේ ක්ෂේත්රවල විදේශීය අයදුම්කරුවන්ට ඉහළ ප්රමුඛතාවක් තිබුණත්, විදේශයෙන් අයදුම් කරන හෙදියන් සහ ගුරුවරුන් ඇතුළු බොහෝ දක්ෂ සේවකයන් වීසා පෝලිමේ පසුපසට ගොස් තිබෙනවා.
ව්යාපාරික කණ්ඩායම් පවසන්නේ කලින් සති කිහිපයකින් ලැබුණු වීසා තීරණ දැන් සමහර අවස්ථාවල වසරකට ආසන්න කාලයක් ගතවන තත්ත්වයකට පත්ව ඇති බවයි.
ඉදිකිරීම්, සෞඛ්ය සහ අධ්යාපන ක්ෂේත්රවල ඔස්ට්රේලියාව තුළ සිට අයදුම් කරන අයට තවමත් වැඩි ප්රමුඛතාවක් හිමිවන අතර, විදේශයෙන් අයදුම් කරන අයට ප්රමාදය වැඩි වී තිබෙනවා.
රජයේ අරමුණ විදේශ සංක්රමණයෙන් ලැබෙන ශුද්ධ ජනගහන වර්ධනය අඩු කිරීම වන අතර, දැනට 300,000ක් පමණ වන එම සංඛ්යාව 2028 වනවිට 225,000 දක්වා අඩු කිරීම ඉලක්ක කර තිබෙනවා.
මේ අතර ඔස්ට්රේලියා සංක්රමණ පද්ධතිය සම්බන්ධයෙන් ඉදිරියේදී තවත් වෙනස්කම් ප්රකාශයට පත් කිරීමට සූදානම් වන බවද පුවත් ආරංචි මාර්ග සඳහන් කරනවා.
