ඔස්ට්‍රේලියාවේ කුලී නිවාස අර්බුදය තවදුරටත් උග්‍ර වෙමින් පවතින බව නවතම වාර්තාවකින් හෙළිවී තිබෙනවා.

විශේෂත්වය වන්නේ පූර්ණකාලීනව රැකියාවල නිරත වන අත්‍යවශ්‍ය සේවකයන්ට පවා තම ආදායමට ගැළපෙන නිවසක් සොයාගැනීම දැන් දැඩි අභියෝගයක් වී තිබීමයි.

Anglicare ආයතනයේ නවතම Rental Affordability Snapshot වාර්තාවට අනුව Retail සේවකයන්, Social Workers සහ Cleaners වැනි වෘත්තීන්හි නිරත පුද්ගලයන්ට දැරිය හැකි මට්ටමේ කුලී නිවාස ප්‍රමාණය සමස්ත දැන්වීම්වලින් 1%කටත් අඩුයි.

මේ සඳහා ඔස්ට්‍රේලියාව පුරා පළ කර තිබූ කුලී නිවාස දැන්වීම් 48,776ක් පරීක්ෂා කර ඇති අතර, අධ්‍යයනයට වෘත්තීන් 16ක් ඇතුළත් කර තිබෙනවා.

Nurses සඳහා දැරිය හැකි නිවාස ප්‍රමාණය 1.1%ක් වන අතර Teachers සඳහා එය 3.3%ක් පමණයි.

පසුගිය වසර පහ තුළ නිවාස කුලී ගාස්තු සැලකිය යුතු ලෙස ඉහළ ගොස් ඇති අතර, ඒ හා සසඳන විට වැටුප් වර්ධනය සිදුවී ඇත්තේ ඊට වඩා අඩු වේගයකින් බවත් වාර්තාව පෙන්වා දෙනවා.

මෙම තත්ත්වය විසඳීම සඳහා පෞද්ගලික කුලී වෙළෙඳපොළ මත පමණක් රඳා නොසිට රජයේ මැදිහත්වීමෙන් සමාජ සහ දැරිය හැකි නිවාස වැඩි වශයෙන් ඉදිකළ යුතු බවට Anglicare ආයතනය ඉල්ලීමක් කර තිබෙනවා.