ඔස්ට්‍රේලියාවේ පොලී අනුපාත යළි ඉහළ දැමීමට ගත් තීරණයත් සමඟ වසර අවසන් වීමට පෙර රජයේ වියදම් අඩු කිරීම සඳහා නව ක්‍රියාමාර්ග සොයා බැලීමේ අවශ්‍යතාව තහවුරු වී ඇති බව අගමැති ඇන්තනී ඇල්බනීසි පවසනවා.

දෙසැම්බර් මාසයේදී නිකුත් කිරීමට නියමිත මධ්‍ය වාර්ෂික ආර්ථික හා මූල්‍ය වාර්තාව (MYEFO) හරහා රජයේ වියදම් අඩු කිරීමට අදාළ යෝජනා ඉදිරිපත් කිරීමටයි ලේබර් රජය සැලසුම් කර ඇත්තේ.

කෙසේ වෙතත්, රජය ඉදිරිපත් කළ වියදම් ඉතිරි කිරීමේ යෝජනා කිහිපයකට විපක්ෂයේ Coalition පක්ෂ එකමුතුව විරුද්ධ වී ඇති බවට අගමැතිවරයා චෝදනා කරනවා.

වයස අවුරුදු 65ට වැඩි පුද්ගලයන්ට අදාළ පෞද්ගලික සෞඛ්‍ය රක්ෂණ සහන වෙනස් කිරීමේ යෝජනාව ද ඊට ඇතුළත් බවයි ඔහු පෙන්වා දෙන්නේ.

ඉන්ධන බදු අඩු කරන ලෙස ඉල්ලා සිටින අතරම රජයේ වියදම් ඉතිරි කිරීමේ යෝජනාවලට විරුද්ධ වීම පරස්පර විරෝධී ක්‍රියාවක් බවත්, ඉන්ධන බදු වෙනස් කිරීම උද්ධමනයට බලපෑ හැකි බවත් අගමැතිවරයා සඳහන් කරනවා.

කෙසේ වෙතත්, රජයේ වියදම් අඩු කිරීමේදී සෞඛ්‍ය හා අධ්‍යාපන ක්ෂේත්‍රවලින් මුදල් කපා හැරීමට තම රජය සූදානම් නොමැති බව ඇල්බනීසි අවධාරණය කරනවා.

විශේෂයෙන් ඉදිරියේදී වැඩිහිටි සත්කාර සේවා (Aged Care) සඳහා අවශ්‍ය අරමුදල් සපයා ගැනීම වෙනුවෙන් තවදුරටත් වියදම් ඉතිරි කළ හැකි ක්‍රම සොයා බලන බවයි අගමැතිවරයා වැඩිදුරටත් ප්‍රකාශ කර ඇත්තේ.