මෙල්බන්හි ගිනිකොනදිග Keysborough ප්‍රදේශයේ අද අලුයම සිදුවූ බිහිසුණු රිය අනතුරකින් පුද්ගලයෙකු ජීවිතක්ෂයට පත්ව තවත් දෙදෙනෙකු තුවාල ලබා තිබෙනවා.

Keysboroughහි Cheltenham Road සහ Bracknell Street ආසන්නයේදී මෝටර් රථයක් විදුලි කණුවක ගැටීමෙන් මෙම අනතුර සිදුව ඇති බවයි වික්ටෝරියා පොලිසිය පවසන්නේ.

ගැටීමත් සමඟ මෝටර් රථය කොටස් දෙකකට කැඩී ගොස් ඇති අතර, අනතුරුව එය ගිනිගෙන තිබෙනවා.

සිද්ධියෙන් පසු එම ස්ථානයෙන් පලාගිය බව කියන පුද්ගලයෙකු අසල නිවසක ඉදිරිපස මිදුලේ බරපතළ තුවාල සහිතව සිටියදී සොයාගෙන ඇති අතර, වයස අවුරුදු 20ත් 29ත් අතර පසුවන බවට සැකකෙරෙන තවත් පුද්ගලයෙකු අනතුර සිදුවූ ස්ථානයේදී තුවාල ලබා සිටියදී හමුවී තිබෙනවා.

ගිනි නිවන භටයන් පැමිණ මෝටර් රථයේ හටගත් ගින්න නිවා දැමීමෙන් අනතුරුව, එහි සුන්බුන් අතර තිබී පුද්ගල මළ සිරුරක් සොයාගෙන ඇති බව පොලිසිය තහවුරු කරනවා.

මේ අතර අනතුර සිදුවීමට පෙර මෝටර් රථය අධික වේගයෙන් ගමන් කරමින් තිබූ බවට ලැබී ඇති තොරතුරු සම්බන්ධයෙන් විමර්ශන ආරම්භ කර තිබෙනවා.

වික්ටෝරියා පොලිසියේ Major Collision Investigation Unit නිලධාරීන් අනතුරට හේතුව සොයා විශේෂ විමර්ශනයක් සිදුකරන අතර, Cheltenham Road සහ Chandler Road ආසන්නයේ රථවාහන ගමනාගමනයට සීමා පනවා තිබෙනවා.

අනතුර දුටු පුද්ගලයන්ට හෝ එම අවස්ථාවේ Dashcam දර්ශන ඇති පුද්ගලයන්ට Crime Stoppers අංක 1800 333 000 ඔස්සේ පොලිසියට තොරතුරු ලබාදෙන ලෙසයි ඉල්ලා ඇත්තේ.