ඔස්ට්‍රේලියාවට ආසන්න ජනප්‍රිය සංචාරක ගමනාන්තයක් වන සොලමන් දූපත් වෙත සංචාරය කරන පුද්ගලයන් සඳහා නව electronic visa system එකක් හඳුන්වාදීමත් සමඟ, ඔස්ට්‍රේලියානු සංචාරකයන්ට අමතර වියදමක් දැරීමට සිදුව තිබෙනවා.

නව ක්‍රමය යටතේ නිවාඩු ගතකිරීම, සංචාරක ස්ථාන නැරඹීම සහ විනෝදාත්මක කටයුතු සඳහා සොලමන් දූපත් වෙත යන සංචාරකයන්ට පිටත්වීමට පෙර online හරහා වීසා ලබාගැනීමට අවශ්‍ය වනවා.

මෙම සංචාරක වීසා සඳහා ඔස්ට්‍රේලියානු ඩොලර් 140ක පමණ ගාස්තුවක් අය කෙරෙන බවයි වාර්තා වන්නේ.

නව e-Visa ක්‍රමය 2025 ඔක්තෝබර් මාසයේ සිට සංවර්ධනය කර ඇති අතර, 2026 අගෝස්තු 23 වැනිදා සිට online හරහා වීසා අයදුම්පත් සහ ගෙවීම් භාරගැනීම ආරම්භ කර තිබෙනවා.

මෙම වීසා බලපත්‍රය වසරක කාලයක් සඳහා වලංගු වන අතර, එම කාලය තුළ කිහිපවරක් සොලමන් දූපත් වෙත ඇතුළුවීමට අවසර හිමිවනවා.

එක් සංචාරයකදී මාස තුනක් දක්වා එරට රැඳී සිටීමට ද හැකියාව පවතිනවා.

කෙසේ වෙතත්, Australian Traveller Media ආයතනයේ කළමනාකාර අධ්‍යක්ෂ Quentin Long පෙන්වා දෙන්නේ මෙම අධික වීසා ගාස්තුව හේතුවෙන් ඔස්ට්‍රේලියානු පවුල් වෙනත් සංචාරක ගමනාන්ත තෝරාගැනීමට පෙළඹිය හැකි බවයි.

පවුලක් ලෙස සංචාරය කරන විට වීසා සඳහා පමණක් සැලකිය යුතු මුදලක් වැයවීම සංචාරකයන්ට අමතර බරක් වන බවයි ඔහු සඳහන් කර ඇත්තේ.

2025 වසරේදී ඔස්ට්‍රේලියානුවන් 9,242 දෙනෙකු සොලමන් දූපත් වෙත සංචාරය කර ඇති අතර, එය පෙර වසරට සාපේක්ෂව සියයට 15.4ක වර්ධනයක්.

මේ අතර, Solomon Airlines ගුවන් සේවය Brisbane සිට සොලමන් දූපත්වල Honiara නගරය දක්වා ක්‍රියාත්මක කරන ගුවන් ගමන් සතියකට තුනක් දක්වා අඩුකර තිබීම ද සංචාරක කර්මාන්තයට අභියෝගයක් වී තිබෙනවා.

සොලමන් දූපත් සංචාරක ප්‍රවර්ධන ආයතනය ද නව වීසා ක්‍රමය හඳුන්වාදීමේදී ප්‍රමාණවත් තොරතුරු ලබානොදීම හේතුවෙන් සංචාරකයන් සහ ගුවන් සේවා අතර අවිනිශ්චිතතාවක් ඇතිවී තිබෙන බව පිළිගෙන තිබෙනවා.

ඒ අතරම, සොලමන් දූපත්වල ඉන්ෆ්ලුවෙන්සා වැනි රෝග ලක්ෂණ සහිත රෝගීන්ගේ සංඛ්‍යාව ඉහළ යාම සම්බන්ධයෙන් ද ඔස්ට්‍රේලියානු රජයේ Smartraveller සේවාව සංචාරකයන්ට සෞඛ්‍ය අනතුරු ඇඟවීමක් නිකුත් කර තිබෙනවා.