ඔස්ට්‍රේලියාවේ Northern Territory ප්‍රාන්තයේ ළමා සුරැකුම් මධ්‍යස්ථානයකදී මාස 22ක් වයසැති දැරියක මියයාමේ සිද්ධියක් සම්බන්ධයෙන් එම මධ්‍යස්ථානයට සහ එහි සේවිකාවකට අධිකරණය විසින් දඩ නියම කර තිබෙනවා.

2023 වසරේ Darwin නගරයට ගිනිකොන දෙසින් පිහිටි Humpty Doo Community and Child Care Centre හිදී Ebony Thompson නමැති දැරියගේ ගෙල කුකුළු කූඩුවක් අසල පිහිටි වැටක සිරවීමෙන් මෙම අනතුර සිදුව තිබෙනවා.

වැටේ සිරවී සිටි දැරිය සේවිකාවක විසින් සොයාගෙන රෝහල්ගත කර ඇති අතර, දින දෙකකට පසු ඇය මියගොස් ඇති බවයි අධිකරණයේදී අනාවරණය වී ඇත්තේ.

දරුවන්ගේ ආරක්ෂාව තහවුරු කිරීමට අපොහොසත් වීම සහ ප්‍රමාණවත් අධීක්ෂණයක් සිදු නොකිරීම සම්බන්ධයෙන් එම මධ්‍යස්ථානයේ සේවිකාවක වන Casandra Lee Harris වරද පිළිගෙන ඇති බවයි සදහන්.

ඒ අනුව, ළමා සුරැකුම් මධ්‍යස්ථානයට ඔස්ට්‍රේලියානු ඩොලර් 40,000ක දඩයක් සහ අදාළ සේවිකාවට ඩොලර් 2,000ක දඩයක් නියම කර ඇති බවයි වාර්තා වන්නේ.

අනතුර සිදුවූ ස්ථානයේ සිටින දරුවන් සේවකයන්ට පැහැදිලිව නොපෙනෙන බවට මීට පෙර නියාමන වාර්තාවකින් අනතුරු අඟවා තිබුණද, එම ගැටලුව නිවැරදි කිරීමට මධ්‍යස්ථානය පියවර ගෙන නොතිබූ බව අධිකරණයේදී හෙළිව තිබෙනවා.

Darwin Local Court හි විනිසුරු Stephen Geary සඳහන් කර ඇත්තේ, මෙම සිද්ධියේදී සේවිකාවට වඩා ළමා සුරැකුම් මධ්‍යස්ථානයට වැඩි වගකීමක් පැවරෙන බවයි.

මේ අතර, දැරියගේ ගෙල සිරවූ ආකාරයට සමාන අනතුරු නැවත සිදුවීම වැළැක්වීම සඳහා ඉහළ කෙළවරේ හිස සිරවිය හැකි වළලු සහිත වැටවල් භාවිතය තහනම් කරන ලෙස දැරියගේ පවුලේ සාමාජිකයන් අධිකරණයෙන් ඉල්ලා තිබෙනවා.

එමෙන්ම, දරුවන් අධීක්ෂණය කිරීමේ නීති තුන්වරක් උල්ලංඝනය කරන ළමා සුරැකුම් මධ්‍යස්ථානවල ආරක්ෂක ගැටලු නිවැරදි කරන තෙක් ඒවා තාවකාලිකව වසා දැමීමේ නීතියක් හඳුන්වා දෙන ලෙස ද ඔවුන් ඉල්ලා ඇති බවයි සඳහන්.