ඔස්ට්‍රේලියාවේ මරණවලට ප්‍රධානතම හේතුව ලෙස ඩිමෙන්ෂියා සහ ඇල්සයිමර් රෝගය හඳුනාගෙන ඇති පසුබිමක, එම රෝග තත්ත්වයන් ඇතිවීමේ අවදානම අඩුවීම සමඟ සම්බන්ධ රැකියා රටාවක් පිළිබඳ නව අධ්‍යයනයකින් තොරතුරු අනාවරණය වී තිබෙනවා.

Australian Bureau of Statistics (ABS) ආයතනය නිකුත් කළ 2025 වසරට අදාළ දත්ත අනුව, ඩිමෙන්ෂියා සහ ඇල්සයිමර් රෝගය හේතුවෙන් පුද්ගලයන් 19,019 දෙනෙකු මියගොස් ඇති අතර, එය ඔස්ට්‍රේලියාවේ සමස්ත මරණවලින් 10.1%ක් බවට සඳහන් වී තිබුණා.

මේ අතර ඇමෙරිකාවේ Washington University in St. Louis විශ්වවිද්‍යාලයේ පර්යේෂකයන් විසින් පුද්ගලයන් 13,879 දෙනෙකුගේ දත්ත ඇසුරින් සිදුකළ අධ්‍යයනයකින් හෙළිවී ඇත්තේ, විශ්‍රාම යන වයසේදී පූර්ණකාලීන රැකියාවක නිරත වීම හෝ සම්පූර්ණයෙන් විශ්‍රාම ගැනීම වෙනුවට අර්ධකාලීන රැකියාවක නිරත වීම ඩිමෙන්ෂියා අවදානම අඩුවීම සමඟ සම්බන්ධ වන බවයි.

වයස අවුරුදු 75 පමණ වනතුරු අර්ධකාලීන රැකියාවල නිරත වූවන් අතර, සංසන්දනය කළ අනෙකුත් රැකියා සහ විශ්‍රාම රටාවන්ට සාපේක්ෂව ඩිමෙන්ෂියා ඇතිවීමේ සම්භාවිතාව 38%කින් පමණ අඩු බව එහිදී හඳුනාගෙන තිබෙනවා.

අර්ධකාලීන රැකියාවක නිරත වීමෙන් මානසික ක්‍රියාකාරීත්වය, සමාජ සබඳතා සහ දෛනික ජීවිතයේ ක්‍රමවත්භාවය පවත්වා ගැනීමට අවස්ථාව ලැබිය හැකි බව පර්යේෂකයන් පවසනවා. එමෙන්ම පූර්ණකාලීන රැකියාවකට සාපේක්ෂව විවේකය, විනෝදාංශ සහ සෞඛ්‍යයට හිතකර ක්‍රියාකාරකම් සඳහා වැඩි කාලයක් වෙන්කර ගැනීමට ද අර්ධකාලීන රැකියාවක් උපකාරී විය හැකි බවයි ඔවුන් වැඩිදුරටත් පෙන්වා දෙන්නේ.

කෙසේ වෙතත්, අර්ධකාලීන රැකියාවක නිරත වීමෙන් ඩිමෙන්ෂියා රෝගය වැළැක්විය හැකි බව මෙම අධ්‍යයනයෙන් තහවුරු කර නොමැති අතර, එහි ප්‍රතිඵල තවමත් ස්වාධීන විද්‍යාත්මක සමාලෝචනයකට ලක්ව නොමැති බවයි වාර්තා වන්නේ.