ඔස්ට්‍රේලියාවේ වීසා අයදුම්පත් සහ ඇතැම් වීසා තීරණ සමාලෝචනය කිරීමේ ක්‍රියාවලියට අදාළ නව නීති සංශෝධන කිහිපයක් අද (01) සිට ක්‍රියාත්මක වීමට නියමිතයි.

ඔස්ට්‍රේලියානු රජය විසින් ලියාපදිංචි කළ Migration Amendment (2026 Measures No.1) Regulations 2026 රෙගුලාසි යටතේ මෙම සංශෝධන හඳුන්වා දී තිබෙනවා.

මෙහි ප්‍රධාන වෙනසක් වන්නේ Protection Visa සඳහා අයදුම් කර ඇති ඇතැම් පුද්ගලයන්ට Bridging Visa B ලබාගැනීම සම්බන්ධයෙන් නව කොන්දේසි හඳුන්වා දී තිබීමයි.

ඒ අනුව, Protection (Class XA) Visa සඳහා ඉදිරිපත් කළ අයදුම්පතක් පිළිබඳ අවසන් තීරණයක් ලැබී නොමැති හෝ එම අයදුම්පත සම්බන්ධ අධිකරණ සමාලෝචන ක්‍රියාවලියක් තවමත් අවසන් වී නොමැති පුද්ගලයන්ට නව Bridging Visa B අයදුම්පතක් ඉදිරිපත් කිරීමේදී සීමාවන් පැනවෙනවා.

මීට අමතරව, වෙනත් substantive visa අයදුම්පත් සහ ඒවා සම්බන්ධ අධිකරණ සමාලෝචන ක්‍රියාදාමයන් පිළිබඳ නව සුදුසුකම් කොන්දේසි ද හඳුන්වා දී තිබෙනවා.

තවත් වැදගත් වෙනසක් වන්නේ Administrative Review Tribunal (ART) වෙත ආරක්ෂාව සම්බන්ධ වීසා තීරණයක් සමාලෝචනය කිරීමට ඉදිරිපත් කරන අයදුම්පත් සඳහා වන ගාස්තුවයි.

නව රෙගුලාසි අනුව, එවැනි සමාලෝචන අයදුම්පතක නියමිත ගාස්තුව අදාළ සාමාන්‍ය සමාලෝචන ගාස්තුවෙන් 50%ක් ලෙස නියම කර ඇති අතර, සංක්‍රමණ රැඳවුම් භාරයේ සිටින ඇතැම් අයදුම්කරුවන්ට ගාස්තු නිදහස් කිරීම් ද ලබාදී තිබෙනවා.

එසේම, පනතේ සඳහන් නිශ්චිත අවස්ථාවලදී ගෙවූ සමාලෝචන ගාස්තුව සම්පූර්ණයෙන් ආපසු ලබාදීමට ද විධිවිධාන සලසා තිබෙන බවයි සදහන් වන්නේ.

නව වීසා සුදුසුකම් සංශෝධන අද දින එනම් නොවැම්බර් 01 වැනිදායින් පසුව ඉදිරිපත් කරන අදාළ වීසා අයදුම්පත් සඳහා බලපැවැත්වෙන අතර, ART ගාස්තු සම්බන්ධ සංශෝධන අද (01) හෝ ඉන් පසුව ගනු ලබන තීරණ සමාලෝචනය කිරීමේ අයදුම්පත් සඳහා අදාළ වනවා.

කෙසේ වෙතත්, මෙම නව රෙගුලාසි මඟින් ඔස්ට්‍රේලියාවට පැමිණෙන සියලුම ශ්‍රී ලාංකිකයන්ට හෝ සියලුම Student, Skilled සහ Visitor වීසා අයදුම්කරුවන්ට පොදු තහනමක් පනවා නොමැති අතර, අදාළ වීසා වර්ගය සහ පුද්ගලයාගේ අයදුම්පත් තත්ත්වය අනුව නව නීතිවල බලපෑම වෙනස් වනවා.

ඒ අනුව, ඔස්ට්‍රේලියාවේ සිටින සහ ඔස්ටේලියාවට යාමට බලාපොරොත්තු වන ශ්‍රී ලාංකිකයන් තමන්ට අදාළ වීසා කොන්දේසි සහ නව නීති සංශෝධන පිළිබඳ නිල තොරතුරු පරීක්ෂා කිරීම වැදගත් වනවා.