New South Wales ප්‍රාන්තයේ café සහ coffee shop සඳහා හඳුන්වා දීමට සැලසුම් කර තිබූ නව coffee cup නීති දෙකක්, ව්‍යාපාරිකයන්ගේ දැඩි විරෝධය හමුවේ ඉවත් කිරීමට ප්‍රාන්ත රජය තීරණය කර තිබෙනවා.

NSW රජය පසුගියදා නිවේදනය කළේ, කැෆේ තුළ සිට කෝපි පානය කරන පාරිභෝගිකයන්ට පිඟන් මැටි කෝප්ප හෝ වීදුරු කෝප්ප ලබාදීම අනිවාර්ය කිරීමට ගෙන තිබූ තීරණය ක්‍රියාත්මක නොකරන බවයි.

එමෙන්ම නැවත භාවිත කළ හැකි කෝපි කෝප්ප ලබාදීමේ වැඩසටහන්වලට (Reusable Cup Schemes) සම්බන්ධ වීම ද ව්‍යාපාරිකයන්ගේ කැමැත්ත මත පමණක් සිදුවන අතර, ඒ සඳහා කිසිදු අනිවාර්ය නීතියක් ක්‍රියාත්මක නොකරන බව රජය ප්‍රකාශ කර තිබෙනවා.

NSW පරිසර අමාත්‍ය Penny Sharpe සඳහන් කරන්නේ, කුඩා ව්‍යාපාරිකයන් මුහුණ දෙන ආර්ථික අපහසුතා සහ අමතර වියදම් පිළිබඳ ඉදිරිපත් වූ පැමිණිලි සැලකිල්ලට ගෙන මෙම තීරණය ගත් බවයි.

මුල් සැලැස්ම අනුව 2028 වසරේ සිට කැෆේ තුළ කෝපි පානය කරන පාරිභෝගිකයන්ට Reusable Cup ලබාදීම අනිවාර්ය කිරීමට නියමිතව තිබුණා.

කෙසේ වෙතත්, නව කෝප්ප මිලදී ගැනීම, ඒවා පිරිසිදු කිරීම සහ අමතර සේවක වියදම් දැරීමට සිදුවීම හේතුවෙන් තම ව්‍යාපාරවලට ආර්ථික පීඩනයක් ඇතිවන බවයි කැෆේ හිමියන් පෙන්වා දී ඇත්තේ.

එහෙත් ප්ලාස්ටික් අපද්‍රව්‍ය අවම කිරීම සඳහා හඳුන්වා දුන් අනෙකුත් නීති තවදුරටත් ක්‍රියාත්මක කිරීමට නියමිතයි.

ඒ අනුව 2028 වසරේ සිට එක්වරක් පමණක් භාවිත කරන Takeaway Coffee Cups ප්‍රතිචක්‍රීකරණය කළ හැකි ආකාරයෙන් නිෂ්පාදනය කළ යුතු අතර, පාරිභෝගිකයන් රැගෙන එන පිරිසිදු Reusable Cups භාරගැනීම ද අදාළ ව්‍යාපාර සඳහා අනිවාර්ය වනවා.

මීට අමතරව Plastic Bread Tags, Balloon Sticks, Microbeads සහ කුඩා ප්ලාස්ටික් සෝයා සෝස් බහාලුම් ඇතුළු ප්ලාස්ටික් නිෂ්පාදන කිහිපයක් සම්බන්ධයෙන් ද නව සීමා සහ නීති ක්‍රියාත්මක කිරීමට සැලසුම් කර තිබෙනවා.

NSW රජය අවධාරණය කරන්නේ, පරිසර දූෂණය අවම කිරීමේ අරමුණ වෙනස් නොවන නමුත්, කුඩා ව්‍යාපාරවලට අමතර ආර්ථික බරක් පැටවීමෙන් තොරව එම වැඩපිළිවෙළ ක්‍රියාත්මක කිරීමට අපේක්ෂා කරන බවයි.

කෙසේ වෙතත්, අත්හැර දැමීමට තීරණය කළ නීතිමය විධිවිධාන තවමත් නිල වශයෙන් අවලංගු කර නොමැති අතර, ඒවා බලාත්මක නොකරන බව NSW පරිසර ආරක්ෂණ අධිකාරිය තහවුරු කර තිබෙනවා.