ඔස්ට්‍රේලියාවේ විදේශීය රියදුරු බලපත්‍ර Australian Driver’s Licence බවට පරිවර්තනය කිරීමේ නීති අද සිට ප්‍රාන්ත දෙකක ලිහිල් කර තිබෙනවා.

ඒ අනුව Western Australia සහ Queensland ප්‍රාන්තවලදී රටවල් 14කින් නිකුත් කළ රියදුරු බලපත්‍ර හිමි සුදුසුකම් ලත් පුද්ගලයන්ට Theory Test සහ Practical Driving Test නොමැතිව ඔස්ට්‍රේලියානු රියදුරු බලපත්‍රයක් ලබාගැනීමට අවස්ථාව හිමිවනවා.

පසුගිය වසරේ හඳුන්වා දුන් දැඩි නීති හේතුවෙන් මෙම රටවල රියදුරන්ට විභාග සඳහා පෙනී සිටීමට සිදුවූ අතර, නව ඇගයීමකින් පසුව එම තීරණය වෙනස් කිරීමට බලධාරීන් පියවර ගෙන තිබෙනවා.

නව සහනය හිමිවන රටවල් 14 වන්නේ:

Bulgaria
Cyprus
Czech Republic
Estonia
Hungary
Latvia
Lithuania
Poland
Romania
Serbia
Slovakia
Slovenia
South Korea
Taiwan

මෙම රටවල රියදුරු බලපත්‍ර නිකුත් කිරීමේ ක්‍රමවේද, අනන්‍යතාව තහවුරු කිරීමේ ආරක්ෂක පියවර සහ මාර්ග ආරක්ෂාව පිළිබඳ දත්ත සලකා බැලීමෙන් පසුව නව තීරණය ගෙන ඇති බව Austroads ආයතනය සඳහන් කරනවා.

අනෙකුත් ප්‍රාන්තවලට මෙම නීතිය ක්‍රියාත්මක වන දින:

Western Australia සහ Queensland – 2026 ඔක්තෝබර් 31
New South Wales, South Australia සහ Northern Territory – 2027 ජනවාරි 1
Tasmania – 2027 පෙබරවාරි 1

Victoria සහ Australian Capital Territory ප්‍රදේශවල මෙම නව ක්‍රමවේදය ක්‍රියාත්මක වන දිනය මෙතෙක් ප්‍රකාශයට පත්කර නැහැ.

මෙම වෙනස්කම් සමඟ ඔස්ට්‍රේලියාවේ Recognised Overseas Licences Scheme යටතේ පිළිගැනෙන විදේශීය රියදුරු බලපත්‍ර නිකුත් කරන රටවල් සහ ප්‍රදේශ සංඛ්‍යාව 42 දක්වා ඉහළ ගොස් ඇති අතර New Zealand සඳහා වෙනම විධිවිධාන ක්‍රියාත්මක වනවා.

කෙසේ වෙතත්, මෙම සහනය අදාළ වන්නේ සාමාන්‍ය මෝටර් රථ සහ යතුරුපැදි බලපත්‍ර සඳහා පමණක් වන අතර, බර වාහන රියදුරු බලපත්‍ර සඳහා වෙනම නීති ක්‍රියාත්මක වනවා.

එමෙන්ම විභාගවලින් නිදහස් වුවද, අයදුම්කරුවන් අදාළ ප්‍රාන්තයේ අනන්‍යතාව, පදිංචිය, සෞඛ්‍යය සහ අනෙකුත් බලපත්‍ර අවශ්‍යතා සපුරාලිය යුතුයි.

ශ්‍රී ලංකාවේ රියදුරු බලපත්‍ර හිමියන්ට මෙම නව සහනය අදාළ නොවන අතර, ශ්‍රී ලංකාව මෙම අලුතින් පිළිගත් රටවල් 14 අතරට ඇතුළත් කර නැහැ.

ඔස්ට්‍රේලියාවට තාවකාලිකව පැමිණෙන සංචාරකයන්ට වලංගු විදේශීය රියදුරු බලපත්‍රයක් භාවිත කිරීම සම්බන්ධයෙන් දැනට ක්‍රියාත්මක නීති මෙම වෙනස්කම් හේතුවෙන් වෙනස් නොවන බව ද බලධාරීන් අවධාරණය කරනවා.