ඔස්ට්‍රේලියාවේ Queensland ප්‍රාන්තයේ යෝජිත ඩොලර් බිලියනයක් වටිනා ගල්අඟුරු පතල් ව්‍යාපෘතියකට ඉදිරි සැලසුම් කටයුතු කරගෙන යාම සඳහා Queensland ඉඩම් අධිකරණය අවසර ලබාදී තිබෙනවා.

Whitehaven Coal සමාගම විසින් යෝජනා කර ඇති මෙම Winchester South පතලෙන් වසරකට ගල්අඟුරු ටොන් මිලියන 17ක් පමණ නිෂ්පාදනය කිරීමට අපේක්ෂා කරන බවයි සදහන්.

කෙසේ වෙතත්, පතලේ ඉදිකිරීම් සහ මෙහෙයුම් ආරම්භ කිරීමට පෙර Queensland ප්‍රාන්ත රජයේ සහ ෆෙඩරල් රජයේ අවසන් අනුමැතිය ලබාගත යුතු ව පවතින බවයි වාර්තා වන්නේ.

පරිසර සංරක්ෂණය වෙනුවෙන් කටයුතු කරන Australian Conservation Foundation සහ Mackay Conservation Group යන සංවිධාන දෙක මෙම ව්‍යාපෘතියට විරෝධය පළ කරමින් අධිකරණයට කරුණු ඉදිරිපත් කර තිබුණු අතර ඒ, පතල හේතුවෙන් පරිසරයට සිදුවිය හැකි බලපෑම්, දේශගුණික විපර්යාස සහ අනාගතයේ ගල්අඟුරු සඳහා පවතින ඉල්ලුම පිළිබඳ ගැටලු මුල් කරගෙනයි.

අධිකරණයේදී ඉදිරිපත් වූ කරුණු අනුව, පතලේ ගල්අඟුරු දහනය කිරීමෙන් ගෝලීය උෂ්ණත්වය සෙල්සියස් අංශක 0.0003කින් ඉහළ යා හැකි බවත්, එමෙන්ම පතලේ සමස්ත මෙහෙයුම් කාලය තුළ කාබන් ඩයොක්සයිඩ් විමෝචන ටොන් මිලියන 557කට අධික ප්‍රමාණයක් නිකුත් විය හැකි බවත් අධිකරණයට කරුණු ඉදිරිපත් කර තිබෙනවා.

කෙසේ වෙතත්, පරිසරයට සිදුවිය හැකි බලපෑම් පිළිබඳ විරෝධතා තිබුණද, එම හේතු මත පමණක් ව්‍යාපෘතිය ප්‍රතික්ෂේප කළ යුතු බවට ඉදිරිපත් කළ ප්‍රධාන තර්ක පිළිගැනීමට නොහැකි බව විනිසුරු Nicholas Loos සිය තීන්දුවේ සඳහන් කර තිබෙනවා.

ව්‍යාපෘතියෙන් Isaac කලාපයට රැකියා අවස්ථා සහ ආර්ථික ප්‍රතිලාභ හිමිවන බවත්, පතලේ සමස්ත මෙහෙයුම් කාලය තුළ ඔස්ට්‍රේලියානු ඩොලර් මිලියන 696ක පමණ රාජ්‍ය ආදායමක් ලැබිය හැකි බවත් සඳහන්.

පතලේ ඉදිකිරීම් සහ මෙහෙයුම් කටයුතු හරහා රැකියා 500ක් පමණ නිර්මාණය කිරීමට අපේක්ෂා කරන බවයි Whitehaven Coal සමාගම පවසන්නේ. මෙම පතලේ සමස්ත මෙහෙයුම් කාලය වසර 35ක් ලෙස ඇස්තමේන්තු කර ඇති අතර, ඉන් වසර 28ක් ගල්අඟුරු කැණීම සහ අපනයනය සඳහා වෙන් කිරීමට නියමිතයි.

අධිකරණ තීන්දුවෙන් පසු ව්‍යාපෘතිය ඉදිරියට ගෙන යන්නේ ද යන්න පිළිබඳ අවසන් තීරණය Queensland ප්‍රාන්ත රජය විසින් ගනු ඇති අතර, ඉන් අනතුරුව අවශ්‍ය ෆෙඩරල් අනුමැතියද ලබාගත යුතු වනවා.