පසුගියදා ඔස්ට්‍රේලියාවේ Canberra නුවර පුද්ගලයෙකුට පිහියෙන් ඇනීමේ සිද්ධියක් සම්බන්ධයෙන් නව යොවුන් වියේ පසුවන පුද්ගලයන් තිදෙනෙකුට චෝදනා එල්ල කර ඇති බවට පොලිස් නිවේදනයක් නිකුත් කර තිබෙනවා.

ඔක්තෝබර් 14 වැනිදා අලුයම Belconnen ප්‍රදේශයේදී මෙම සිදුවීම වාර්තා වී ඇති අතර, එහිදී 23 හැවිරිදි පුද්ගලයෙකුට කිහිපවරක් පිහියෙන් ඇන ඇති බවටයි වාර්තා වන්නේ.

සිද්ධියට පෙර එම ප්‍රදේශයේ වාහනවලට විවිධ ද්‍රව්‍යවලින් පහර දෙන පිරිසක් පිළිබඳව ද පොලිසියට පැමිණිලි කිහිපයක් ලැබී ඇති බවත් සදහන්.

සිද්ධිය සම්බන්ධයෙන් කළ විමර්ශනවලදී වයස අවුරුදු 14ක පිරිමි ළමුන් දෙදෙනෙකු සහ 16 හැවිරිදි පිරිමි ළමයෙකු හඳුනාගෙන, බරපතළ ශාරීරික හානි සිදුකිරීමේ චෝදනා යටතේ නඩු ගොනු කර තිබෙනවා.

මේ අතර, සිද්ධියට සම්බන්ධ බවට හඳුනාගත් 12 හැවිරිදි පිරිමි දරුවෙකු මෙවැනි වැරදි හැසිරීම් නිවැරදි කර ඔවුන් නැවත අපරාධවලට යොමුවීම වැළැක්වීමේ අරමුණින් Safer Youth Response Service නම් වැඩසටහනක් වෙත යොමු කිරීමට පියවර ගෙන ඇති බවත් පොලිස් නිවේදනයේ සදහන්.

පිහි ඇනුමට ලක්වූ පුද්ගලයා රෝහල්ගත කර ඇති අතර, මේ වනවිට ඔහුගේ තත්ත්වය ස්ථාවර මට්ටමක පවතින බවයි රෝහල් ආරංචි මාර්ග තහවුරු කරන්නේ.