ඔස්ට්‍රේලියාවේ 2025–2026 මූල්‍ය වර්ෂයට අදාළ Tax Returns ඉදිරිපත් කිරීම සඳහා ලබාදී ඇති කාලය අවසන් වීමට තවත් දින දෙකක් පමණක් ඉතිරිව ඇති බව Australian Taxation Office (ATO) ආයතනය ජනතාවට සිහිපත් කරනවා.

ඒ අනුව, තමන් විසින්ම Tax Return ඉදිරිපත් කරන පුද්ගලයන් නොවැම්බර් 2 වැනි සඳුදා රාත්‍රී 11.59ට පෙර සිය බදු වාර්තා ඉදිරිපත් කළ යුතු බවයි ATO ආයතනය නිවේදනය කර ඇත්තේ.

සාමාන්‍යයෙන් Tax Return ඉදිරිපත් කිරීමේ අවසන් දිනය ඔක්තෝබර් 31 වැනිදා වුවද, මෙවර එය සෙනසුරාදා දිනයකට යෙදීම හේතුවෙන් අවසන් දිනය නොවැම්බර් 2 දක්වා දීර්ඝ කර තිබෙනවා.

නියමිත කාලයට බදු වාර්තා ඉදිරිපත් නොකරන පුද්ගලයන්ට දින 28ක ප්‍රමාද කාලයක් සඳහා ඩොලර් 364 බැගින්, උපරිම ඩොලර් 1,820ක් දක්වා දඩ මුදලක් පැනවිය හැකි බවට ද ATO ආයතනය අනතුරු අඟවනවා.

කෙසේ වෙතත්, ප්‍රමාද වන සෑම පුද්ගලයෙකුටම ස්වයංක්‍රීයව දඩ මුදලක් පනවන්නේ නැති අතර, පුද්ගලයාගේ පෙර බදු වාර්තා ඉදිරිපත් කිරීමේ ඉතිහාසය සහ අනෙකුත් තත්ත්වයන් සැලකිල්ලට ගන්නා බව සඳහන්.

ඔක්තෝබර් 19 වැනිදා නිකුත් කළ ATO දත්තවලට අනුව, මේ වනවිට ඔස්ට්‍රේලියානුවන් මිලියන 9ක් පමණ සිය ආදායම් බදු වාර්තා ඉදිරිපත් කර තිබුණද, තමන් විසින්ම වාර්තා සකස් කරන තවත් මිලියන 2කට ආසන්න පිරිසක් ඒ වනවිටත් Tax Return ඉදිරිපත් කර තිබුණේ නැහැ.

මේ අතර, අද (ඔක්තෝබර් 31) වනවිට ලියාපදිංචි Tax Agent කෙනෙකුගේ සේවාදායක ලැයිස්තුවට ඇතුළත් වී සිටින සුදුසුකම් ලත් පුද්ගලයන්ට 2027 මැයි මාසය දක්වා බදු වාර්තා ඉදිරිපත් කිරීමට අමතර කාලයක් හිමිවිය හැකියි.

එම අවසන් දිනය පුද්ගලයාගේ බදු තත්ත්වය අනුව වෙනස් විය හැකි බව ද සඳහන්.

H&R Block ආයතනයේ බදු සන්නිවේදන අධ්‍යක්ෂ Mark Chapman පෙන්වා දෙන්නේ, බදු වාර්තා ඉදිරිපත් කිරීම අවසන් මොහොත දක්වා කල් දැමීම ඔස්ට්‍රේලියානුවන් අතර බහුලව දක්නට ලැබෙන තත්ත්වයක් බවයි.

විශේෂයෙන් අමතර බදු මුදලක් ගෙවීමට සිදුවේ යැයි ඇති බිය, බදු සහන පිළිබඳ අවබෝධයක් නොමැති වීම සහ අවශ්‍ය ලේඛන සකස් කිරීමේ අපහසුතා හේතුවෙන් ඇතැම් පුද්ගලයන් මෙම කටයුත්ත ප්‍රමාද කරන බව ඔහු සඳහන් කරනවා.

කෙසේ වෙතත්, බදු මුදලක් ගෙවීමට ඇති බිය නිසා Tax Return ඉදිරිපත් කිරීම කල් දැමීමෙන් ගෙවිය යුතු මුදල අඩු නොවන අතර, ඒ වෙනුවට අමතර දඩ සහ පොලී ගෙවීමට සිදුවිය හැකි බව ද ඔහු අවධාරණය කරනවා.

නියමිත කාලය තුළ බදු වාර්තා ඉදිරිපත් කිරීමට අපහසු පුද්ගලයන්ට හැකි ඉක්මනින් ATO ආයතනය සම්බන්ධ කරගෙන අවශ්‍ය සහාය ලබාගන්නා ලෙසයි උපදෙස් ලබා දී ඇත්තේ.